Polıtsııaǵa kómektesken aqmolalyqtarǵa 1 mln teńgeden astam syıaqy berildi
Vedomstvonyń málimetinshe, búgingi kúni Aqmola oblysynyń polıtsııa departamentinde 2 746 adamdy biriktiretin 600-den astam qoǵamdyq qurylym jumys isteıdi. Qoǵamdyq tártipti qorǵaýǵa óńirdiń ártúrli kásiporyndar men uıymdar qyzmetkerlerinen, stýdentterden, qoǵamdyq keńesterden quralǵan 1 600-den astam adam jáne 455 «Saqshy» jáne «Sarbaz» jasaǵy úles qosyp keledi.
«Oblys turǵyndary profılaktıkalyq aktsııalarǵa, joǵalǵan adamdardy izdeýde belsendilik tanytady, sondaı-aq, patrýldik polıtsııa jasaqtarymen birlesip qoǵamdyq tártipti saqtaýdy júzege asyrady jáne qylmystardy ashýǵa kómektesedi», - dedi vedomstvonyń baspasóz qyzmetindegiler.
«Podezd aqsaqaldary» kómegi páter urlyǵynyń aldyn alý, qoǵamdyq tártipti buzý faktilerin anyqtaý boıynsha aldyn alý jumysyn júrgizý kezinde baǵa jetpes. Mal urlyǵyn ashýda tártip saqshylaryna «Saqshy» jáne «Sarbaz» jasaqtary kómek kórsetedi. Jasaqtarda 149 erikti bar.
«Aqmola oblysy men Kókshetaý qalasynda jyl basynan beri polıtsııanyń qoǵamdyq kómekshileriniń qatysýymen 50 qylmys ashylyp, 914 quqyq buzýshylyq anyqtaldy. Osy rette, polıtsııaǵa kómektesken aqmolalyqtarǵa 1 mıllıon teńgeden astam syıaqy berildi», - dep tolyqtyrdy vedomstvodan.