Polıtsııaǵa qarý tapsyrǵan aqmolalyqtarǵa 4 mln teńge syıaqy tólendi
KÓKShETAÝ. QazAqparat - Aqmola oblysynda turǵyndardan tirkelmegen atys qarýyn, oq-dáriler men jarylǵysh zattardy satyp alý boıynsha respýblıkalyq aktsııa ótýde, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, aqmolalyqtar polıtsııaǵa erikti túrde qarý-jaraq zattaryn tapsyrǵany úshin qarýdyń túrine qaraı ár danasy úshin 10-nan 100 aılyq eseptik kórsetkishke deıingi somada tólem alady.
«Aktsııanyń maqsaty - qoǵamdyq qaýipsizdikti qamtamasyz etý, atys qarýy men jarylǵysh zattardy qoldaný arqyly jasalǵan qylmystardyń aldyn alý. Sondaı-aq, bul azamattarǵa birneshe sanat boıynsha baǵalanatyn erikti túrde tapsyrylǵan qarý birligi úshin qosymsha aqshalaı syıaqy alýǵa múmkindik beredi», - deıdi vedomstvodan.
PD baspasóz qyzmetinen atap ótkendeı, aktsııa barysynda 10 kúnniń ishinde óńir turǵyndary polıtsııa bólimshelerine jalpy quny 4 mıllıon teńgeden astam somaǵa 72 qarý tapsyrdy, onyń ishinde 60 tegis uńǵyly, 10 – oıyq, 2-travmatıkalyq.
«Qazirgi kezde tapsyrylǵan qarýlar departamenttiń jedel – krımınalıstıkalyq basqarmasynda ballıstıkalyq saraptamadan ótkizilýde. Zertteý nátıjeleri boıynsha azamattarǵa aqshalaı qarajat tólenedi», - dep tolyqtyrdy vedomstvodan.
