Polıtsııadan qashqan óskemendik júrgizýshi adam qaǵyp ketti
ÓSKEMEN. QazAqparat - Kólikti mas kúıinde tizgindegen óskemendik polıtsııadan qashamyn dep jaıaý júrginshini qaǵyp ketti, dep habarlaıdy QazAqparat tilshisi
Oblystyq ishki ister departamentiniń baspasóz qyzmetiniń habarlaýynsha, Óskemen qalasynyń jol-patrýldik polıtsııa batalony mas kúıinde kólik aıdaǵan júrgizýishini ustaǵan.
Subaru Legacy kóliginiń Voroshtlov kóshesimen qatty júrip kele jatqanyn baıqaǵan saqshylar, kúdikti kóliktiń sońyna túsip, birneshe ret toqtaýyn talap etedi. Júrgizýshi buıryqqa qulaq aspaı, baǵdarshamnyń qyzyl belgisinen de ótip ketken. Onymen qoımaı, jaıaý júrginshini qaqqan.
«Qýǵynshy ekıpajdyń bir múshesi zardap shegýshiniń qasynda qalyp, jedel járdem qyzmetin shaqyrdy. 24 jastaǵy azamatsha túrli dene jaraqatymen aýrýhanaǵa jetkizildi. Al mas júrgizýshi Krasın kóshesiniń boıynda ustaldy. Amaly taýsylǵan júrgizýshi kóligin tastap qashpaq bolǵan. Saqshylardyń jedel áreketteriniń arqasynda kólik ıesi uzap kete almady» - delingen departament taratqan aqparatta.
«Qashqyn» 27 jastaǵy Óskemenniń turǵyny jáne onyń astyndaǵy kólik óziniki bolmaı shyqty. Qazir bul oqıǵaǵa baılanysty Qylmystyq kodekstiń 345-baby boıynsha tergeý júrip jatyr.
