Polıtsııadan qashqan Leksýs kóligi aýdarylyp qaldy - Almaty oblysy
TALDYQORǴAN. QazAqparat - Almaty oblysynyń Qaratal aýdanynda polıtsııadan qashqan júrgizýshi kóligimen aýdarylyp qaldy, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe,
Júrgizýshi 26 sáýirde keshke Taldyqorǵan qalasynyń 27 jastaǵy turǵyny «Leksýs-470» avtokóligin masań kúıde basqaryp, «Taldyqorǵan-Úshtóbe» avtojolynyń 25-shaqyrymynda ornalasqan №1 sanıtarlyq beketten ótý kezinde polıtseıdiń zańdy talabyn oryndamaı, toqtamastan óte shyqqan. Іzine túsken tártip saqshylaryn kórgen júrgizýshi Qaratal aýdanyna qarasty Eskeldi aýylyna burylǵan. Aýyldan shyǵa ol oblys ortalyǵyna bet alǵan. Degenmen, 27-shaqyrymǵa jetkende kóligine ıe bola almaı, jol jıegine aýdarylǵan. Jol-kólik oqıǵasy saldarynan júrgizýshi men onyń qyzy ártúrli dene jaraqattaryn alyp, aýrýhanaǵa jetkizildi. Al, onyń avtokóligi arnaıy turaqqa qoıyldy.
Sotqa deıingi tergeý barysynda júrgizýshiniń áıeli polıtsııaǵa jubaıy men qyzynyń iz-tússiz joǵalýyna baılanysty jazǵan ótinishi boıynsha ákesi men qyzynyń 2020 jyldyń 15 qańtarynan izdeýde júrgeni anyqtaldy. Densaýlyǵy qalpyna kelgen soń, kúdiktige qatysty bultartpaý sharasy boıynsha sheshim qabyldanatyn bolady.
Bılik ókiline baǵynbaý deregi boıynsha QR Qylmystyq kodeksiniń 379-babyna sáıkes sotqa deıingi tergeý amaldary júrgizilip jatyr. Bılik ókiliniń zańdy talabyn oryndamaǵany úshin kózdeletin qylmystyq jaýapkershilikpen qatar, kúdikti masań kúıde kólik quralyn basqarý, tótenshe jaǵdaı tártibin buzý jáne densaýlyqqa zııan keltirgen jol-kólik oqıǵasyn jasaý derekteri boıynsha qoldanystaǵy ákimshilik zańnamaǵa sáıkes jaýap beretin bolady.
