Polıtsııada 3 387 mal urysy tirkeýde tur - mınıstrlik
NUR-SULTAN. QazAqparat – Sońǵy bes jylda elimiz boıynsha mal urlyǵynyń faktisi 8 myńnan 3,7 myńǵa deıin tómendedi. Bul týraly QR ІІM Krımınaldyq polıtsııa departamenti basshysynyń orynbasary Saǵat Madıev málim etti, dep habarlaıdy QazAqparat tilshisi.
«Krımınogendik jaǵdaıǵa jasalǵan taldaý kórsetkendeı, sońǵy bes jylda respýblıka boıynsha mal urlyǵynyń faktisi 8 myńnan 3,7 myńǵa deıin nemese 60 paıyzǵa tómendegeni baıqalady. Jalpy urlyq qylmystary ishinde mal urlyǵynyń úlesi 3,5 paıyz shamasynda», - dedi S. Madıev.
Taratylǵan málimetterge qaraǵanda, 2015 jyly 19 535 mal basy, 2016 jyly – 25 432, 2017 jyly – 20 059, 2018 jyly – 15 400, al 2019 jyly 10 942 mal basy urlanǵan.
Onyń sózine qaraǵanda, urlanǵan 91 myń bas maldan 42,5 myńy ıesine qaıtaryldy.
«Jalpy, qabyldanǵan sharalardyń arqasynda sońǵy 5 jylda mal urlyǵy úshin 11 myń qylmysker ustaldy», - dep naqtylady Saǵat Madıev.
Onyń aıtýynsha, kóp jaǵdaıda qylmyskerler qaıtalap urlyq jasaıdy. Aǵymdaǵy jyly mal urlyǵy úshin ustalǵan 1 696 adamnyń 678-i buryn osyndaı qylmys jasaǵan. Qazirgi ýaqytta 3 387 mal urysy polıtsııanyń jedel esebinde tur.
