Polıtsııa júk tasymaly salasyndaǵy alaıaqtyqtyń jańa túri týraly aıtty

NUR-SULTAN. QazAqparat –Karantın kezeńinde elorda polıtsııasyna júk tasymaly salasyndaǵy alaıaqtyq faktileri boıynsha shaǵymdar túse bastady. Alaıaqtar áreketiniń algorıtmin sıpattaı kele, barlyq oqıǵada aldaý tásili birdeı ekeni belgili boldy, dep habarlaıdy QazAqparat.

«Qaskúnemder júk tasymalynyń tanymal saıttarynda qala arasyndaǵy tasymaldar týraly habarlandyrýlardy izdegen. Keıinnen júk kóliginiń júrgizýshisi retinde júktiń ıesine telefon shalyp, naryq baǵasynan tómen tarıfti belgileıdi. Sonymen qatar, alaıaqtar júktiń ıesi retinde naqty júrgizýshini taýyp, júk tasymaly týraly ýaǵdalasyp otyrǵan. Osydan keıin júrgizýshiniń qujattaryn alyp, ony júktiń ıesine joldaıly. Óz kezeginde júktiń ıesi sharttyń durystyǵyna kóz jetkizip, júkti jóneltetin orynǵa qujattardy baǵyttaıdy, sondaı-aq ózderin júrgizýshi retinde tanystyrǵan alaıaqtarǵa qyzmeti úshin aldyn ala aqysyn tóleıdi», - delingen Polıtsııa departamentiniń habarlamasynda.

Osylaısha, alaıaqtar deldal retinde áreketterin jasap kelgen jáne olar jaıynda júrgizýshi de, júk ıesi de bilmeıdi.

«Budan keıin olar júkti jetkizý ornyn surap, osy málimetterdi júrgizýshige qaıta joldaıdy. Júrgizýshi tıisti qujattar men júkti alyp, jetkizý ornyna jolǵa shyǵady. Munymen qosa, alaıaqtar ınternet saıttar arqyly júkti satyp alýshylardy taýyp, ony tómen baǵamen ótkizedi. Bul jaǵdaıda júktiń naqty ıesi ózine tıesile zattardyń satylyp ketkenin belmeı qalady», - delingen habarlamada.

Barlyq kelisimderdi alaıaqtar «What`s up» messendjeri arqyly júrgizip, aqsha aýdarymdaryn «Qiwi» ámııany arqyly iske asyrǵan.

Qazirgi ýaqytta polıtseıler kúdiktilerdi anyqtaý boıynsha sharlardy júrgizip jatyr.