Polıtsııa Úrimjide lańkestik jasaǵan terrorıstiń birin tutqyndady
ASTANA. QazAqparat - Polıtsııa Qytaıdyń Shyńjań Uıǵyr avtonomııalyq ólkesinde jarylys jasaǵan 5 adamnan quralǵan lańkestik top músheleriniń kimder ekenin anyqtady. Olardyń 4-eýi oqıǵa ornynda qaza tapsa, bireýi tutqynǵa tústi, dep jazady ITAR-TASS Sınhýa agenttigine silteme jasap.
Lańkestik ornynda qaza tapqan 4 qylmysker DNQ arqyly anyqtalǵan. Besinshisin ótken túni Baıangol-Mońǵol avtonomııalyq okrýginde qolǵa túsirgen. Buǵan deıin lańkesshilerdiń bári mert boldy dep jarııalanǵan bolatyn.
Polıtsııa derekteri boıynsha, 2013 jyldyń aıaǵynda olar qylmystyq top quryp, jarylǵysh zattarmen qarýlanǵan jáne avtomobıldi ıelengen.
Úrimjidegi jarylys 22 mamyr kúni jergilikti ýaqyt boıynsha 07:50-de "Jenmın" saıabaǵyna taıaý jerdegi bazarda bolǵan. Kýágerlerdiń aıtýynsha, eki avtokólik adamdar tobyna kelip soǵylǵan. Sol sátte avtomobılderdiń biri jarylǵan, al ekinshisinen jarylǵysh zatty syrtqa laqtyrǵan. Sońǵy derekter boıynsha 39 adam oqıǵa ornynda kóz jumyp, 94-i jaralandy.
Aıta keteıik, bul Qytaıda sońǵy ýaqytta oryn alǵan lańkestik oqıǵalardyń ishindegi eń irisi bolyp otyr.
