Polıtsııa tótenshe jaǵdaı jáne terrorızmge qarsy operatsııa aıasynda qarý qoldanýǵa májbúr boldy - Ahmetjanov

NUR-SULTAN. QazAqparat – Qańtar oqıǵalary kezinde polıtsııa tótenshe jaǵdaı jáne terrorızmge qarsy operatsııa aıasynda qarý qoldanýǵa májbúr boldy. Bul týraly Májiliste QR Іshki ister mınıstri Marat Ahmetjanov aıtty, dep habarlaıdy QazAqparat tilshisi.

Onyń atap ótýinshe, qańtar oqıǵalary kezinde qarjy uıymdary, bankter, saýda ortalyqtary, dúkender tonaldy. Nátıjesinde, 1 700 azamat pen bıznes sýbektileri zardap shekti. Jalpy shyǵyn somasy 100 mlrd teńgeden asty.

«Ókinishke oraı, 19 qyzmetkerimiz qaza tapty. 3 myńnan astam polıtsııa men áskerı qyzmetshiler jaraqat aldy. Kóptegen qyzmetker áli de em alýda. Birazy ókinishke oraı densaýlyqtaryna baılanysty bolashaqta bizdiń qatarymyzda qyzmetterin jalǵastyra almaıdy. Sondyqtan, qyzmetkerler tótenshe jaǵdaı jáne terrorızmge qarsy operatsııa aıasynda qarý qoldanýǵa májbúr boldy»,- dedi ol.

Osy oraıda mınıstr qarý qoldaný «Quqyq qorǵaý qyzmeti týraly» Zańnyń 61-babyna sáıkes júzege asqanyn aıtty.

«Atap aıtqanda azamattardy qorǵaý; qyzmetkerlerge jáne kúzetý obektilerine jasalǵan shabýylǵa toıtarys berý; qarý men arnaıy kólikterdi basyp alýǵa jol bermeý jáne qarýly adamdardy ustaý maqsatynda qoldanyldy»,- dedi Marat Ahmetjanov.