Polıtsııa taýdan tabylǵan balanyń neden qaıtys bolǵanyn aıtty
ALMATY. QazAqparat - Almaty oblysy ІІD 7 jasar balanyń ólimine qatysty túsinik berdi, dep habarlaıdy QazAqparat tilshisi.
Almaty oblystyq ІІD baspasóz hatshysy Sergeı Neznaevtyń aıtýynsha, balanyń denesinen zorlyq-zombylyq belgileri baıqalmaǵan.
«Balanyń denesinen kúshtep óltirý belgileri baıqalmady. Denesi erteń sot-medıtsınalyq saraptamaǵa beriledi. Balany áskerı qyzmetkerler men TJD ókilderi izdedi. Máıit Yntymaq aýylyna jaqyn jerden tabyldy. Olar izdeý kezinde bul mańnan ótken. Baıqamaǵan bolýy kerek», - deıdi Sergeı Neznaev.
Eske salaıyq, taýda joǵalǵan Ernur Sadýaqastyń denesi búgin 17:40-ta Jambyl aýdany Yntymaq aýylynan 8 shaqyrym qashyqtyqtaǵy taý baýraıynan tabylǵan bolatyn.
Bala 14 shilde kúni joǵalǵan.
Ony izdestirýge TJD, əkimdik ókilderi, polıtsııa, sarbazdar jumyldyrylǵan edi. Іzdeý toby mańaıdy tikushaqpen súzip, Qyrǵyzstan shekarasyna deıin tintip shyqqan bolatyn.
