Polıtsııa Taldyqorǵan turǵyndaryn úreılendirgen kúdikti zattyń kózin joıdy
TALDYQORǴAN. QazAqparat - «Arlan» arnaıy bólimshesiniń qyzmetkerleri Taldyqorǵan qalasynda turǵyndardyń úreıin alǵan kúdikti zattyń kózin joıdy, dep habarlaıdy QazAqparat Almaty oblysy ІІD baspasóz qyzmetine silteme jasap.
«Turǵyndardyń úreıin týǵyzǵan zat Jansúgirov kóshesiniń boıyndaǵy avtobýs aıaldamalarynyń mańynan tabylǵan.
«Arlan» oblystyq arnaıy bólimshesiniń saperlary kúdikti zat tabylǵan orynnan metall termosty tapty. 4 lıtr suıyqtyq sııatyn ydysty rentgen arqyly jaryqtandyryp kórýge múmkin bolmady. Polıtsııa ony joıý týraly sheshim qabyldady», - delingen baspasóz habarlamasynda.
Osyǵan baılanysty zat tabylǵan oryn aýmaǵy 500 metrge qorshalyp, avtokólikter qozǵalysy shekteldi. Kúdik týdyrǵan zat tómen zarıadty jarylys arqyly joıyldy.
«Turǵyndardyń kúdigi beker bolyp shyqty», - delingen baspasóz baıanynda.
