Polıtsııa sot zalynan qashyp ketken Pákistannyń burynǵy prezıdentin ustady
ASTANA. 19 sáýir. QazAqparat - Jýyrda ǵana sot zalynan qashyp ketken Pákistannyń burynǵy prezıdenti Pervez Mýsharraf Islamabad mańyndaǵy óz úıinde quqyq qorǵaýshylardyń qolyna tústi.
Saıasatkerdi tutqyndaý operatsııasy jergilikti telearnalarda tikeleı efırden kórsetildi, dep habarlady RBK.
Taıaý aralyqta taǵy da sot aldyna keletin oǵan memleketke opasyzdyq tanytty degen aıyp taǵylmaq. Burynǵy prezıdent «Búkilpákistandyq musylmandar lıgasy» partııasynyń kóshbasshysy.
Esterińizge sala keteıik, saıasatker 5 jylǵa sozylǵan qýǵynnan keıin osy jyldyń naýryz aıynda parlamenttik saılaýǵa qatysý maqsatymen Pákistanǵa oralǵan bolatyn. Degenmen el prezıdenti bolyp turǵan 2007 jyly Konstıtýtsııany buzǵany úshin sot onyń saılaýǵa túsýine shekteý qoıǵan-dy. Ol 2008 jyly óz erkimen prezıdenttik laýazymnan ketip, Birikken Arab Ámirlikterinde, Ulybrıtanııada turdy. Al, elden boı tasalaýyna premer-mınıstr Benazır Bhýtto ólimine qatysy bar degen aıyptaýlar túrtki boldy.
Buǵan deıin «Talıban» qozǵalysynyń ókilderi eger de P.Mýsharraf Pákistanǵa oralatyn bolsa qastandyq jasaıtyndyqtaryn málimdep, qoqan-loqy jasaǵan edi. Alaıda burynǵy prezıdent mundaı qorqytýdan aıylyn da jıǵan joq.
