Polıtsııa sherýshilerdi tútindi granatalarmen qýdy
ASTANA. QazAqparat - AQSh-tyń Fergıýson qalasyndaǵy (Mıssýrı shtaty) tártipsizdikter dúısenbige qaraǵan túnde jańa serpinmen órbidi. Reuters-tiń habarlaýynsha, sherýshilerdi tarqatý úshin polıtsııa tútindi granatalardy qoldanǵan.
Agenttiktiń habarlaýynsha, qala kóshelerine 400-den astam adam shyqqan, olardyń arasynda áıelder men balalar da bar. Olar tártip saqshylaryna Molotov kokteılderin laqtyryp, tipti ishinara atys qarýyn da qoldanǵan. Osydan keıin polıtsııa tútindi granatalardyń kómegimen sherýshilerdi sabasyna túsirdi.
Jappaı tártipsizdikterdiń bir qatysýshysy oq jaraqatyn aldy, dep jazady The Los Angeles Times. Basylymnyń málimetinshe, polıtseıler oǵan kómek kórsetý úshin qasyna toqtaǵan kezde, olardyń avtokóligin belgisiz bireýler atqylaǵan.
Budan buryn jazǵanymyzdaı, Fergıýsonnyń shetindegi Sent-Lýıs qalamańynda engizilgen komandanttyq saǵat taǵy bir kúnge uzartylatyn boldy.
Aıta keteıik, tártipsizdikter bul eldi mekende polıtsııa qyzmetkeri 18 jasar Maıkl Braýn esimdi qara násildi jasóspirimdi atyp óltirip tastaýyna baılanysty 9 tamyzdan beri jalǵasyp jatyr. Polıtsııanyń málimetinshe, ol polıtsııa kóliginiń ishinde janjal shyǵaryp, tóbeles kezinde atylǵan bolatyn. Al kýágerlerdiń aıtýynsha, Braýnda eshqandaı qarý bolǵan joq jáne ol qolyn kóterip turǵan kezde atylǵan. Osy oqıǵadan keıin halqynyń 70 paıyzyn afroamerıkandyqtar quraıtyn qalashyqta jappaı narazylyq sharalary kúsheıip ketken bolatyn.
Osy oqıǵaǵa baılanysty 16 tamyzda Mıssýrı shtatynyń gýbernatory Djeı Nıkson tótenshe jaǵdaı týraly málimdep, komendanttyq saǵat engizgen. Al AQSh Prezıdenti Barak Obama Ádilet mınıstrligi men FTB-ge jasóspirimniń ólimin tergeýge tapsyrma berdi.
