Polıtsııa serjantyn balaǵattaǵan qyzylordalyq bir jylǵa sottaldy
QYZYLORDA. QazAqparat - Qyzylorda qalasynyń №2 sotynda qalalyq ІІB-niń polıtsııa serjantyna dórekilik kórsetken turǵynǵa qatysty úkim shyqty, dep habarlaıdy QazAqparat tilshisi sottyń baspasóz qyzmetine silteme jasap.
Іs materıaldaryna sáıkes, oqıǵa túnde oblys ortalyǵyndaǵy Hon Ben Do kóshesi boıynda ornalasqan azyq-túlik dúkeninde bolǵan. Aıyptalýshy kámelet jasqa tolmaǵan jasóspirimmen birge júrgen. Polıtsııa serjanty ony baıqaýsyzda ıyǵymen qaǵyp ótken jáne sol úshin keshirim suraǵan. Іshimdikke mas bolǵan jigit polıtseıge balaǵat sózder aıtyp, daýys kótergen. Tártip saqshysy odan syrtqa shyǵýyn talap etken.
Sottalýshy syrtqa shyqqannan keıin de sabasyna túse qoımaǵan. Tipti, qyzmettik kólikti órteıtinen aıtyp, qoqan-loqqy kórsetken.
«Onymen qatar, janyndaǵy kámeletke tolmaǵan balamen birge polıtsııa serjanty kóligine otyrǵan boıdan bastap, ony uıaly telefonnyń beınekamerasyna túsire bastaǵan. Keıin vıdeony áleýmettik jelide taratqan. Solaısha, adamnyń ar-namysyna nuqsan keltiretin áreket jasaǵan», - delingen sottyń habarlamasynda.
Qyzylorda qalalyq №2 sotynyń úkimimen tártip saqshysyna dórekilik kórsetken jigit QR Qylmystyq kodeksiniń 378-baby 2-bóligimen kináli dep tanyldy. Ol 240 saǵatqa qoǵamdyq jumysqa tartylatyn bolady. Oǵan qosa, sottalýshy Qylmystyq kodekstiń 380-babynyń 1-bóligimen aıypty dep tanylyp, 1 jylǵa bas bostandyǵynan aıryldy. Jazasyn qylmystyq-atqarý júıesiniń qaýipsizdigi barynsha tómen mekemesinde óteıdi.
Ádilet QAŃTARBAEV
Foto: pankredit.com
