Polıtsııa saılaýda barynsha ustamdy bolý týraly meniń tapsyrmamdy oryndady - QR Prezıdenti

NUR-SULTAN. QazAqparat - Búgin Aqordada otandyq jáne sheteldik BAQ ókilderine suhbat bergen QR Prezıdenti Qasym-Jomart Toqaev saılaý kúninde qoǵamdyq tártipti qamtamasyz etken polıtsııa qyzmetkerlerine rızashylyq bildirdi, dep habarlaıdy QazAqparat tilshisi.

«Shynymen de Almaty men elordada adamdar óz oılaryn bildirý úshin kóshege shyqty. Bas prokýratýra mundaı áreketterdi zańsyz dep jikteýi múmkin», - dedi ol BAQ ókilderiniń saýalyna oraı.

Memleket basshysy keıbir azamattardyń tarapynan arandatýshylyq áreketteriniń oryn alýyna baılanysty polıtsııa qyzmetkerleri ózge adamdardyń qaýipsizdigi men tynyshtyǵyna qaýip tóndirmeý úshin shara qoldanǵanyn aıtty. Sonymen qatar Memleket basshysy saılaý kúninde qoǵamdyq qaýipsizdikti qamtamasyz etken polıtsııa qyzmetkerlerine rızashylyǵyn bildirdi.

«Taǵy da atap ótkim keledi. Saılaý qarsańynda meniń tarapynan saılaý kezinde barynsha ustamdylyq tanytý qajettiligi týraly tapsyrmam boldy. Olar sony jasady», - dedi Qasym-Jomart Toqaev.