Polıtsııa sany jetkilikti bolǵanymen, olardyń sapasy jetkiliksiz - Q. Aıtahanov
ASTANA. QazAqparat - Qazaqstanda polıtseıler sany jetkilikti bolǵanymen, olardyń jumys sapasy jetkiliksiz. Búgin Parlament Senatynyń otyrysynda «Іshki ister organdary týraly» zań jobasyn talqylaý barysynda senator Qýanysh Aıtahanov osyndaı pikir bildirdi.
Depýtattyń paıymynsha, qarapaıym adamdar ishki ister organdarynyń kúndelikti atqaryp jatqan qyzmetiniń sapasy men nátıjeliligi arqyly búkil memleket bıliginiń jumysyna baǵa beredi.
«Qazir zaman da, qundylyqtar da ózgerdi. Qoǵam da, adam da ózgerdi. Talap pen talǵam ártúrli. Mılıtsııanyń ózi polıtsııa bolyp ózgerdi. Alaıda, ishki ister organdarynyń jumysynda zaman talaptaryna saı ózgerister az. Olardyń jumystarynda dórekilik, adam taǵdyryna nemquraılylyq, adam quqyqtaryn qamtamasyz etý emes, qaıta olardyń quqyǵyn shekteýge jaqyn turatyn is-qımyldar kóptep kezdesedi. Bul polıtsııa qyzmetkerlerine degen halyqtyń senimin tómendetýde», - deıdi senator Q. Aıtahanov.
Sonymen qatar, depýtat ótken jyly ishki ister organdary arasynda ótkizilgen attestatsııa qorytyndysyna toqtala kele, oǵan qatysqandardyń 17 paıyzy synaqtan ótpeı qalǵanyn tilge tıek etti. Onyń aıtýynsha, aldaǵy ýaqytta ishki ister organdary óz qyzmetin zań talaptaryna saı, túbegeıli ózgertip, halyq senimine ıe bolý úshin polıtsııa bedelin kóterýge jumys isteýi kerek.
«Qazaqstan polıtsııa qyzmetkerleriniń sany jaǵynan 100 myń turǵynǵa shaqqanda dúnıejúzi boıynsha 6-shy orynda. San jetedi, alaıda sapa tómen. Kadrlar sapasyn kóterý qajet», - deıdi senator.
