Polıtsııa polkovnıgi atanamyn dep oılaǵan joq edim – Tánzılıa Dáýletova
ORAL. QazAqparat – O basta polıtsııa polkovnıgi atanamyn dep oılaǵan joq edim. BQO polıtsııa departamenti shtab basqarmasynyń bastyǵy, polıtsııa polkovnıgi Tánzılıa Dáýletova osylaı aıtty, dep habarlaıdy QazAqparat tilshisi.
Onyń aıtýynsha, óziniń negizgi mamandyǵy matematıka jáne ınformatıka pániniń muǵalimi edi.
Daryndy balalarǵa arnalǵan mektepte ustazdyq etip júrgen Tánzılıa Tursynǵalıqyzy bul salaǵa jubaıynyń shaqyrýymen aýysqan eken. Ol kezde eri Oral qalalyq ishki ister basqarmasynda ınspektor-krımınalıst qyzmetin atqaratyn.
Osylaısha Tánzılıa ishki ister organdaryndaǵy qyzmet jolyn 1996 jyly esepke alý jónindegi tehnık bolyp bastady. Keıin Oral qalalyq ishki ister basqarmasynyń aqparat ortalyǵynda jumys istedi.
-Bastapqyda mindetim táýliktik málimetterdi esepke alý bolatyn. Qazir salystyryp qarasam, sol ýaqyttaǵy jumys pen qazirgi qyzmettiń arasyndaǵy aıyrmashylyq jer men kókteı deýge bolady. Toqsanynshy jyldary aqparat qyzmetkerleri barlyq esepter men málimetterdi qolmen jazyp, ár túrli rekvızıtter boıynsha kartochkalardy qaıta-qaıta eseptep, jýrnaldarǵa jazyp, toltyryp júrdi. Alǵash derbes kompıýterler paıda bolǵannan keıin aqparattar soǵan engizilip, dısketamen jumys jasadyq. Al aýdandyq bólinister aqparatty qaǵazǵa jazyp, qolmen ákeletin, biz sony kompıýterge engizetinbiz. Qazir ondaı dısketalar shyǵarylmaıdy da. Búginde qalalyq jáne aýdandyq bólinister ózderiniń jumys oryndarynda otyryp, aqparatty júktep jibere alady. Zamanaýı tehnologııanyń kómegimen mınıstrlik pen polıtsııa departamenti apparatynyń qyzmetkerleri ol málimetterdi sol boıda qabyldaıdy, - deıdi Tánzılıa Tursynǵalıqyzy.
Keıin aqparat baılanys bólimine qosyldy. 2008 jyly T.Dáýletova sol bólim bastyǵynyń orynbasary boldy. 2017 jyldyń aqpan aıynda departament aqparattyq taldaý ortalyǵynyń bastyǵy bolyp bekitildi. Al 2019 jyldyń mamyr aıynan shtab basqarmasynyń bastyǵy qyzmetin atqaryp keledi.
-Shyny kerek, bul qyzmet ózgeshe, jaýapkershiligi de úlken eken. Barlyq qıyndyqqa tótep berip, beıimdelýge týra keldi. Endi barlyq departament qyzmeti úshin jaýap beresiń. Bir sózben aıtqanda, shtab departamenttiń mıy deıdi, sol ras! – deıdi polıtsııa polkovnıgi.
-Tánzılıa Tursynǵalıqyzy, 8 naýryz merekesi sizge nesimen qymbat, odan ne kútesiz?
-Biz de ata-ana úlgisin kórip óstik. Erterekte ákem plastmassadan jasalǵan gúlin artyna jasyryp kelip, anama syılaıtyn. Bul – eń aldymen analar merekesi. Qazir anamdy ańsaımyn, joqtaımyn, anaǵa jetetin eshkim joq qoı.
Men jalpy merekeni jek kórmeımin. Týǵan kúnimde, basqalaı meıramda balam meni syılap, shoq gúlin, tartýyn usynyp jatady. Sol bala-kelinimniń qýantqanynan artyq eshteńe joq. Al qyzmet babynda úlken syılyq kútpeımiz. Áıel zatyna kishkene kóńil bólse, sonyń ózi jetip jatyr.
-Qyzmet baspaldaǵymen osylaısha kóterilemin dep oıladyńyz ba?
-Qarapaıym qyzmetkerden osy laýazymǵa deıin jetemin dep oılaǵan joqpyn. Bári de tynymsyz eńbekpen keldi.
Negizi adam qandaı jumys jasamasyn, bárine asa uqyptylyqpen, jaýapkershilikpen qaraý kerek. Talmaı eńbek etseń, ataq-dańq, mártebe degeniń ózdiginen keletin dúnıe eken. Sonymen qatar eshkimge qııanat jasamaı, adamdarmen jyly qarym-qatynasta bolý qajet. Ózgege istegen jaqsylyǵyń túbi qaıtady eken. Balama da osy aqylymdy aıtyp otyramyn.
-Ulyńyzdyń ata-anasynyń jolyn qýǵanyn qaladyńyz ba?
-Balam, shyny kerek, eseıgesin mamandyqty óz erkimen tańdady. Kúni búgin ol Aqtóbe qalasynda tis dárigeri qyzmetinde, kelinim de sondaı mamandyq alamyn dep, bilim alyp jatyr.
-Halyqaralyq áıelder kúnine oraı zamandastaryńyzǵa ne tilek aıtar edińiz?
-Kóktem merekesimen barlyq áriptesterimdi jáne zamandastarymdy quttyqtaımyn. Biz er azamattarmen birge qyzmet atqaramyz, degenmen zatymyz áıel bolǵandyqtan, náziktigimizdi joǵaltpasaq eken. Qyzmetpen baılanysty máseleniń barlyǵy úıdiń tabaldyryǵynda qalyp, otbasynda tynyshtyq, baq-bereke ornap, jaqyn adamdaryń qýanta berse eken deımin. Eń bastysy, elimiz aman, jurtymyz tynysh bolsyn!
