Polıtsııa podpolkovnıgi Araı Dúısenaeva: Qyzmetim úlken jaýapkershilikti talap etedi
Araı polıtsııa qyzmetkeri bolýdy bala jasynan aldyna maqsat etip qoıdy. Qyzylorda qalasyndaǵy №9 mektep-gımnazııany úzdik bitirgen ol, sol armannyń jetegimen 2004 jyly QR Іshki ister mınıstrliginiń Aqtóbe zań kolledjine zańger mamandyǵyna oqýǵa tústi. Al 2010 jyly Qorqyt ata atyndaǵy Qyzylorda memlekettik ýnıversıtetiniń zańger mamandyǵyn támamdady. Eńbek jolyn 2006-2008 jyldarda Qyzylorda qalalyq ishki ister basqarmasynda anyqtaýshy qyzmetinen bastady. Al 2008-2016 jyldarda oblystyq Іshki ister departamentinde aǵa anyqtaýshy retinde qyzmetin jalǵastyrdy. 2016 jyldan búgingi kúnge deıin oblystyq Polıtsııa departamentinde asa mańyzdy ister jónindegi aǵa anyqtaýshy qyzmetin atqaryp keledi.
«Qyzmetim úlken jaýapkershilikti talap etedi. Árbir usaq-túıekke mán berýimiz tıis. Mundaı dúnıelerdi jiti nazarda ustaýymyz qajet. Sonda ǵana naqty nátıjege qol jetkizemiz. Óz qyzmetimdi jaýapkershilikpen oryndaýǵa tyrysamyn», - deıdi Araı.
Araı Dúısenaeva 1988 jyly 18 qańtarda dúnıege kelgen. Onyń áýletinde polıtsııa sapynda eńbek etken jaqyndary bar. Atasy Latıf Dúısenaev 40 jylǵa jýyq polıtsııa qyzmetinde abyroıly qyzmet atqardy. Al aǵasy Erjan Kýbenov 1998-2015 jyldar aralyǵynda krımınaldyq polıtsııa salasynda qylmyspen kúresti, búginde otstavkadaǵy polıtsııa podpolkovnıgi.
Jas bolsa da Araı óz ortasyna syıly. Ol jarqyn da jyly júzimen kópshilikti baýraı túsedi. Otbasynda kórgen tárbıe onyń adamı bolmysyna áser etti. Qaıratty da qajyrly bolýyna septigin tıgizdi. Qyzmet pen otbasynyń berekesin qatar ustap, shańyraǵynyń uıytqysy, adal jar, aıaýly ana bolyp otyrǵan Araı qazirgi tańda otaǵasymen birge eki ul tárbıeleýde.
Araıdyń qazirgi áskerı sheni - podpolkovnık. Ol qazaq qyzdarynyń óz otbasy men qoǵam tárbıesin qatar ala júrip, sol jolda bıik abyroı-bedelge qol sozyp otyr.
«Polıtsııa qyzmetinde 15 jyldan beri qyzmet etip kelemin. Bul salada jemisti qyzmet etý - meniń bala kezdegi armanym. Qoǵamdaǵy quqyq buzýshylyqtyń aldyn alyp, beıbit ómirdi qalyptastyrýǵa kúsh-jigerimdi salyp kelemin. Osy tusta atam men aǵamnan alǵan ómirlik daǵdylarym qyzmetimdi abyroımen atqarýǵa septigin tıgizýde» - deıdi Araı Dúısenaeva.