Polıtsııa matematıka sabaǵynda pornografııalyq slaıd kórsetken adamdy izdep jatyr
NUR-SULTAN. QazAqparat – Elorda polıtsııasy qala mektepteri biriniń 5 synyp oqýshylaryna sabaq ústinde porno slaıd kórsetken adamdy izdep jatyr. Bul týraly Nur-Sultan qalalyq polıtsııa departamentiniń baspasóz qyzmetinen málim etti, dep habarlaıdy QazAqparat tilshisi.
«2020 jyldyń 3 qyrkúıeginde, saǵat 16-30-da «ZOOM» platformasynda matematıka sabaǵyn ótip jatqan elorda mektepteriniń biriniń 5 synyp oqýshylaryna bógde adam qosylyp, balalardyń kompıýter ekranynda uıatsyz slaıdtar kórsetip, boqtyq sóz aıtqan. Osylaısha ol matematıka sabaǵynyń ótýine bóget jasaǵan. Onlaın-sabaq rejımine 14 oqýshy qatysqan», - dep atap ótedi departamentten.
Qazirgi ýaqytta Nur-Sultan qalalyq polıtsııa departamenti atalǵan fakti boıynsha QR Qylmystyq kodeksiniń 311-baby boıynsha qylmystyq is qozǵady.
«Kináli tulǵa jaýapkershilikke tartylady. Qazirgi ýaqytta tekserý júrip jatyr», - dedi vedomstvodan.
Aıta keteıik, Qylmystyq kodekstiń 311-baby pornografııalyq materıaldardy nemese zattardy zańsyz taratýǵa qatysty qoldanylady.
Atalǵan bapta pornografııalyq materıaldardy nemese zattardy taratý nemese jarnamalaý maqsatynda olardy zańsyz daıyndaý, taratý, jarnamalaý, sol sııaqty pornografııalyq sıpattaǵy baspa basylymdaryn, kıno- nemese beınematerıaldardy, beınelerdi nemese ózge de zattardy zańsyz alyp ótý nemese olarmen saýda jasaǵany úshin múlki tárkilenip nemese onsyz, eki myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne alty júz saǵatqa deıingi merzimge qoǵamdyq jumystarǵa tartýǵa ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanatyndyǵy kórsetilgen.
