Polıtsııa qyzmetkerleriniń quqyǵyn qorǵaýdy kúsheıtý kerek- B.Beknazarov
ASTANA. QazAqparat - Polıtsııa qyzmetkerleriniń quqyǵyn qorǵaýdy kúsheıte túsý kerek. Búgin Parlament Senatynyń jalpy otyrysynda senator Bektas Beknazarov osy máseleni kóterdi.
Sóz arasynda depýtat Elbasy aıqyndaǵan ult josparynda jergilikti qaýymdastyqqa esep beretin polıtsııa qyzmetin qurý týraly tapsyrma júktegenin, bul baǵyttaǵy zań jobasy Parlamentte qaralyp jatqanyn tilge tıek etti. «Elimizde qoǵamdyq tártipti nyǵaıtýda, qylmysqa qarsy turýda, usaq qylmys pen buzýshylyqty joıýda jergilikti polıtsııa qyzmeti negizgi ról atqaratyny daýsyz. Al meniń aıtpaǵym, osy máseleniń ekinshi jaǵy, ıaǵnı polıtsııa qyzmetkerleriniń ózderin zańmen qorǵaý máselesi», - deıdi depýtat.
Bul rette senator sońǵy jyldary zańnyń ústemdigine qyzmet etip, jer-jerde oryn alyp jatqan tártipsizdikterdi tııýǵa áreketter qoldanyp júrgen, qoǵamnyń tynyshtyǵyn kúni-túni kúzetetin, sol úshin óz densaýlyǵyn, tipti ómirin qıyp jatqan tómengi dárejedegi polıtsııa qyzmetkerlerin jalpy jurtshylyqqa jaǵymsyz etip kórsetý áreketteri elimizde beleń ala bastaǵanyn atap ótti. Onyń paıymynsha, bundaı jaǵdaı polıtsııa qyzmetkerlerine qarsy qoldanylatyn nebir zańsyz áreketterdiń kóbeıýine ákep soqtyryp jatyr. Sóziniń negizi retinde depýtat birqatar statıstıkalyq derekterdi de alǵa tartty.
«Qoǵamdyq tártipti qamtamasyz etýge baılanysty polıtsııa qyzmetkerleriniń zańdy talaptaryna baǵynbaǵany úshin ákimshilik jaýapkershilikke tartylǵan azamattardyń sany sońǵy bes jylda on eseden artqan: 2010 jyly - 78 adam bolsa, aǵymdaǵy jyldyń tek alǵashqy jarty jylynda 804 adamǵa jetti. Óz qyzmettik ókilettigin atqaryp júrgen polıtsııa qyzmetkerlerine qorlaý kórsetkeni úshin qylmystyq jaýaptylyqqa tartylǵan azamattardyń sany da sońǵy bes jylda 4 eseden asty: 2011 jyly - 118 adam, bıylǵy jyldyń 6 aıynda - 414 adam. Ákimshilik nemese qylmystyq jaýaptylyqqa tartylǵandardyń ózderinen qatań jazaǵa tartylyp jatqandary da shamaly. Bul statıstıkalyq derekter qoldanystaǵy zańnyń tıimdiligi tym tómen ekenin kórsetedi», - deıdi Bektas Beknazarov.
Onyń aıtýynsha, elimizdegi polıtseılerdiń basym bóligi jergilikti polıtsııa qyzmeti júıesine enip, turǵyndarmen olardyń araqatynasy barynsha jaqyndaıtyn bolsa, onda polıtsııalardyń zańdy ókilettiligi de kúsheıtilýi kerek. «Óıtpese, kóshede kóringen áıeldiń tepkisinde qalyp, pogony julynyp, jaǵasy jyrtylyp jatqan polıtsııa qyzmetkerleri zańnyń ústemdigine qalaı qorǵan bola alady? Ata zańymyzda aıtylǵan quqyqtyq memlekettiń myzǵymas negizi eń aldymen qatań tártipten bastaý alady. Olaı bolsa, qatań tártipti qorǵaýshy qyzmetkerlerge qarsy jasalyp jatqan zańsyz áreketterdiń barlyǵy boıynsha kináli adamdar tıisti jaýapkershilikke tartylyp, olar qoǵamnyń synyna ushyraýy kerek», - dep atap ótti Bektas Beknazarov.
