Polıtsııa qyzmetkerleriniń atyn jamylyp óz qatarlaryn tonaǵan jasóspirimderdiń isi áshkerelendi
ALMATY. 28 jeltoqsan. QazAqparat /Názıra Eleýhan/ - Almatyda ózderin polıtsııa qyzmetkerleri dep tanystyryp, kóshede ketip bara jatqan bozbalalardan jeke bastaryn tekserý retinde olardyń uıaly telefondaryn, aqshalary men oıyn quraldaryn tartyp alyp otyrǵan jasóspirimder ustaldy.
Olardyń úsheýi de qalanyń árqıly mektepteriniń toǵyzynshy synyp oqýshylary jáne úsheýi de jaǵdaıy bar zııaly otbasynyń balalary bolyp shyqty.
«Olar óz qurbandaryna túrli-tústi skaner men prınter arqyly daıyndalǵan polıtseı qyzmetkeriniń jasandy kýáligin, sondaı-aq radıostantsııa da kórsetken. Al bozbalalar oǵan kúmánsiz senip, óz múlikterin ońaı bere salǵan. Al qaraqshylardyń talaptaryn oryndamaǵandarǵa kóbinese kúsh qoldanǵan. Jas qaraqshylardyń ózderi Almatynyń Túrksib aýdanynyń turǵyndary bolǵanymen, olar urlyq pen alaıaqtyq áreketterin Bostandyq aýdanynyń aýmaǵynda jasap júrgen. Tonalǵan balalardyń ata-anasynan aryz-shaǵymdar dál bizdiń aýdandyq ishki ister basqarmasyna kelip tústi»,- dep málimdedi Bostandyq aýdandyq ІІB bastyǵy, polıtsııa polkovnıgi Anvar Turysbekov.
Onyń aıtýynsha, kúdiktilerdi izdep tabý men ustaý jedel ýákilderge asa qıyndyq týdyra qoımaǵan.
«Qazirgi tańda kúdiktilerdiń úsheýi de quryqtaldy. Olar aýdandyq ІІB-da. Qaskóı qaraqshylar óz istegenderin moıyndaı otyryp, buryn da osy ispettes birneshe qylmystar jasaǵandaryn aıtty. Onyń mán-jaıy jáne aýqatty otbasy balalary bola tura mundaı qylmysqa ne sebepti barǵandary ary qaraı júrgiziletin tergeý barysynda anyqtalatyn bolady. Tergeýshiler barlyq protsessýaldyq is-áreketterdi oqýshylardyń ata-anasynyń qatysýymen júrgizýde. Ustalǵandardan zattaı aıǵaq retinde 7 uıaly telefon men úsh oıyn quraldary tárkilenip, qylmystyq iske tirkeldi»,- dedi polkovnık Anvar Turysbekov.
