Polıtsııa qyzmetkerlerine turǵyn úıdi jalǵa alýy úshin ótemaqy tólenýi múmkin

ASTANA. QazAqparat - QR Іshki ister mınıstrliginiń shtat sany 10 paıyzǵa qysqarady. Bul týraly Elbasy Joldaýynan týyndaıtyn tapsyrmalardy oryndaý máseleleri qaralǵan QR Úkimetiniń keńeıtilgen otyrysynda QR Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.

Otyrys barysynda Q. Qasymov ІІM júıesin reformalaý josparlary týraly baıandady. Uıymdastyrýshylyq-shtattyq qurylymdy ońtaılandyrý, basqarýshylyq artyq býyndy jáne jekelegen basshylyq laýazymdardy qysqartý jumystary bastalǵanyn atap ótti.

«Jeke quramnyń shtat sany qaıta qaralatyn bolady, olardy 10 paıyzǵa qysqartýdy josparlap otyrmyz, bul shamamen 9000 polıtsııa jáne 1600 - QAJK qyzmetkerleri. Bıýdjet qarajatynyń qalyptasqan únemin qyzmetkerlerdiń laýazymdyq jalaqylaryn arttyrýǵa paıdalanamyz», - dedi Q. Qasymov.

Іshki ister mınıstriniń aıtýynsha, sondaı-aq jol-patrýldik polıtsııasynyń saptyq bólinisteri qyzmetkerleriniń, ýchaskelik polıtsııa ınspektorlarynyń jáne kámeletke tolmaǵandar isteri jónindegi ýchaskelik ınspektorlardyń turǵyn úıdi jalǵa alýy úshin ótemaqy tóleýdi qarastyrý qajet.

Budan ózge, reformalaý aıasynda: ІІM-di ózine tán emes fýnktsııalardan bosatý, qylmystyq-atqarý júıesin jańǵyrtý, azamattyq qorǵaý organdary qurylymyn jetildirý boıynsha sharalardy iske asyrý kózdelgen. Bul jerde memlekettik mekemelerdiń sanyn 54-ten 20-ǵa deıin ońtaılandyrý josparda bar. Sapany arttyrý maqsatynda vedomstvolyq bilim berý júıesin reformalaý jáne kadrlardy irikteý júıesin qaıta qaraý josparlanǵan.