Polıtsııa qyzmetkerlerin balaǵattaǵan Pavlodar turǵyny áreketiniń sebebin túsindirdi
PAVLODAR. QazAqparat - «VKontakte» áleýmettik jelisinde polıtsııa qyzmetkerlerin balaǵattaǵan 26 jastaǵy áıel bul áreketiniń sebebin túsindirdi, dep habarlaıdy «QazAqparat» HAA tilshisi.
Internette jarııalanǵan Pavlodardaǵy saýda úıleriniń biriniń janynda bolǵan jappaı tóbeles týraly aqparattyń astyna pavlodarlyq áıel yzaly pikir qaldyrǵan, dep málimdedi Pavlodar oblystyq ishki ister departamenti. Ol polıtsııa qyzmetkerleriniń qaıda qaraǵandyǵy jaıly suraq qoıyp, olardy balaǵattaǵan.
«Onyń áreketi zańsyz, ol áleýmettik jeli arqyly polıtsııa qyzmetkerleriniń abyroıyn túsirip, ar-namysyna tıip, oǵan balaǵat sózder aıty, - delingen ІІD-iniń baspasóz habarlamasynda.
«Áıeldiń aıtýynsha, ol buryn qaıtys bolǵan azamatpen birge turǵan, ony qasaqana óltirip ketti dep eseptep áleýmettik jeli arqyly polıtsııa qyzmetkerlerin balaǵattaǵan», - deıdi ІІD baspasóz hatshysy Baıan Maǵzumova.
Polıtsııa qyzmetkerleri sondaı-aq, áleýmettik jelilerdegi mátinderdiń avtory - úsh balanyń anasy jáne buǵanǵa deıin avtorlyq quqyq buzýshylyq, urlyq jasaý boıynsha qylmystyq jaýapkershilikke tartylǵandyǵyn habarlaıdy.
Ustalǵan azamatsha kinásin moıyndap otyr. Bul oqıǵa boıynsha Qazaqstan Respýblıkasy Qylmystyq kodeksiniń 378-baby boıynsha sotqa deıingi tekserý júrgizilip jatyr. Tekserý nátıjesi boıynsha azamatshaǵa 300 aılyq eseptik kórsetkishte aıyppul túrinde jaza nemese sol kólemdegi túzeý jumysy túrindegi, nemese 240 saǵatqa deıingi qoǵamdyq jumystarǵa tartý, nemese 75 táýlik merzimimen qamaýǵa alý jaýapkershiligi júktelýi múmkin.
