Polıtsııa qyzmetkerleri shuńqyrǵa qulaǵan aqtóbelikti izdeýge jumyldy
AQTÓBE. QazAqparat - Aqtóbede joǵalyp ketken 54 jastaǵy Kenjebaı Aldashevty izdeý jumystaryna polıtsııa qyzmetkerleri qosyldy, dep habarlaıdy QazAqparat tilshisi.
Aqtóbe qalasy mańyndaǵy Aqjar, Aqshat aýyldary mańynda joǵalyp ketken Kenjebaı Aldashevty týǵan-týystary men dostary, tótenshe jaǵdaılar departamenti izdep jatyr. Týystarynyń aıtýynsha, 10 qarasha kúni Kenjebaı Aldashev qala mańyndaǵy sharýashylyǵynan úıine bet alǵan. Mal sharýashylyǵymen aınalysatyn kásipker bir ret tótenshe jaǵdaılar departamentinen kómek surap, keıin baılanys aıasynan tys qaldy.
«Zarechnyı polıtsııa bólimi 1964 jyly týǵan Kenjebaı Aldashevke izdeý jarııalady. Ulty - qazaq, Aqtóbe oblysynyń týmasy. Boıy 170-175 sm. Shashy qara, dóńgelek júzdi. Betinde kúıikten qalǵan iz bar. Qara shalbar, kúrte kıgen. Joǵalǵan adam týraly kez kelgen aqparat bilgen adam 102, (87132) 99-69-25, 99-68-02 telefondaryna habarlasýdy suraımyz», - dedi oblystyq polıtsııa departamentiniń baspasóz qyzmeti.
Buǵan deıin habarlaǵanymyzdaı, eriktiler men tótenshe jaǵdaılar qyzmeti 10 qarasha kúni izdeýdi bastady. K.Aldashev sol kúni saǵat 04:56-da tótenshe jaǵdaılar qyzmetine telefon shalyp, óziniń shuńqyrǵa qulap ketkenin, kúshi sarqylyp, shyǵa almaı jatqanyn aıtqan. Sodan beri izdeý jumystary júrip jatyr, biraq nátıjesiz.
