Polıtsııa qyzmetkerleri Rýdnyı turǵynynyń úıinen granata tapty
QOSTANAI. QazAqparat - Qostanaı oblystyq Іshki ister departamentiniń uıymdasqan qylmyspen kúres basqarmasynyń qyzmetkerleri sanktsııalanǵan tintý jumystarynyń barysynda Rýdnyı turǵynynyń úıinen tankige qarsy qoldanylatyn granata tapty, dep habarlaıdy QazAqparat oblystyq ІІD-niń UQQK basqarmasy bastyǵynyń mindetin atqarýshy Bahtııar Babaǵalıevke silteme jasap.
Polıtsııa qyzmetkeriniń málimetterine qaraǵanda, Rýdnyı turǵynyn tártip saqshylary qaladaǵy fırmalardyń biriniń dırektorynan 15 myń dollardy bopsalaý barysynda qolǵa túsirgen.
«Polıtsııa qyzmetkerleri kúdiktiniń úıin tintý kezinde tankige qarsy qoldanylatyn «RPG-22» granatasyn tapty. Ol qoldanýǵa jaramdy bolyp shyqty. Sonymen qatar olar 7,62 mm 2 oq tapqan»,-dep tolyqtyrdy B.Babaǵalıev.
45 jastaǵy kúdikti ustalyp, ýaqytsha ustaý ızolıatoryna qamaldy. Onyń ózge qylmystarǵa qatystylyǵy tekserilýde. Osy kezde polıtsııa qyzmetkerleri atalǵan fakti boıynsha, sotqa deıingi tergeý jumystaryn júrgizýde.
