Polıtsııa qyzmetkerleri kezekten tys attestattaý bastalmaı jatyp, óz erikterimen jumystan ketip jatyr - respýblıkalyq basylymdarǵa sholý
** *
«Egemen Qazaqstan» gazeti búgingi sanynda Ekonomıkalyq damý jáne saýda mınıstri Baqytjan Saǵyntaevpen «Halyqtyq ІRO» baǵdarlamasy týraly áńgime qozǵaǵan. Tilshiniń barlyq saýalyna tuşymdy jaýap bergen ol: «Jalpy, aktsııany ıemdený jyldam tabys tabýǵa nemese jalpy tabysty bolýǵa kepildik bermeıdi. Kez kelgen qarjy rynogy, sonyń ishinde qor rynogy da qubylmalylyqqa beıim bolyp keledi. Demek, osy jáne basqa da kompanııanyń aktsııasyn ıemdene otyryp ınvestor táýekelge barady. Sebebi aktsııanyń quny joǵarylap qana qoımaı, sonymen birge tómendep ketýi de yqtımal. Qazaqsha aıtsaq, «Táýekel túbi - jelqaıyq...». Suhbat «Táýekel túbi - jelqaıyq» degen taqyryppen berilgen.
***
«Alash aınasy» gazetiniń jazýynsha, keshe parlamentshilerdi kóp kúttirgen Marchenko myrza Senatqa bas suǵypty. «Birese issaparǵa ketip, endi birde kezekti demalysta bolyp, depýtattardan syrttaı sóz estip júretin bas bankırdiń senatorlarmen júzdesýge saqadaı saılanyp kelgeni birden-aq baıqaldy. Bas bankır júz kórisip qana emes, Ulttyq bank qyzmetine qatysty zań jobasyn eki oqylymda maquldatyp, qabyldatyp biraq ketti. Al senator Jabal Erǵalıev Abylaı hannyń 300 jyldyǵyn 2013 jyly toılaý týraly másele kóterdi», - dep jazady basylym. Maqala «Abylaı hannyń 300 jyldyǵy nege toılanbady?» degen taqyryppen berilgen.
Osy basylymnyń turaqty «Dat!» aıdarynda alashtanýshy ǵalym, tarıh ǵylymynyń doktor, professor Mámbet Qoıgeldimen aradaǵy suhbat «Biz óz tarıhymyzdy, qundylyqtarymyzdy laıyqty deńgeıde baǵalaı almaı kele jatqan halyqpyz» degen taqyryppen berilgen. Suhbat barysynda ǵalym: «Reseıdiń Tıshkov degen tarıhshysy qazir «keńes dáýiri sońynda biraz jaraqattar ǵana qaldyrǵan joq, sonymen birge odan esh kem túspeıtin jetistikter de qaldyrdy» dep aıtyp júr. Bul pikirmen men óz basym esh kelise almaımyn. Másele nede? Keńes bıliginiń artynda qalǵan qııanat pen jetistikterdi tarazyǵa salsaq, menińshe, qııanaty basyp ketedi»,- deıdi.
***
«Aıqyn» gazetiniń búgingi sanynda Almaty qalalyq bilim basqarmasynyń bastyǵy Rahat Shımashevamen aradaǵy suhbat «Shyndyq aıtylǵan jerden shý shyqpaýy tıis» degen taqyryppen jaryq kórdi. Basylym tilshisiniń barlyq saýalyna egjeı-tegjeıli jaýap bergen sheneýnik: «Eger bári oryndy bolsa, áke men shesheniń ball úshin kúresetin jóni bar. Óıtkeni ol oqýǵa túsýdiń birden -bir alǵysharty. Amal qansha, jaqsy oqýǵa yntaly, qoǵamdyq jumystarǵa belsene aralasatyn ul-qyzdardy keıde kótermelep júrip, olardy «juldyzdar» qataryna qosyp alamyz. Osydan kelip olardyń ózi joǵary ball alýǵa mindetti sekildi kórinedi. Olardyń qatary kezinde kóbeıip ketkeni de belgili. Bıylǵy test olarǵa oı saldy», - deıdi.
***
Birneshe polıtsııa qyzmetkeri ishki ister organdarynynan kezekten tys attestattaý bastalmaı jatyp-aq jumystan shyǵyp ketipti. Bul jaıynda «Oko» gazetinde jaryq kórgen «Raporty vmesto «ekzamenov» degen taqyryptaǵy maqalada baıandalǵan. Basylymnyń aqparatyna sáıkes, ishki ister organdary men qylmystyq atqarý júıesi bólimsheleriniń 14 basshysy emtıhan bastalmaı jatyp-aq óz erkimen jumystan ketý úshin raport jazypty. Qazirgi ýaqytta el Premer-Mınıstri basshylyq etetin joǵarǵy attestattaý komıssııasynyń synaǵynan ishki ister organdarynyń 92 basshysy, onyń ishinde Іshki ister mıınstriniń orynbasarlary, komıtet tóraǵalary, mınıstrlik apparaty departamentiniń jáne aımaqtyq ishki ister bólimi men qylmystyq atqarý júıesiniń basshylary aman-esen ótken.
***
«Ekspress-K» gazetiniń jazýynsha, ury sheneýnikter jaıynda naqty aqparat jetkizgen qazaqstandyq azamattarǵa arnaıy syıaqy berilýi múmkin. Mundaı bastamany elimizdiń qarjy polıtsııasy kóterip otyrǵan kórinedi. Atalǵan vedomstvo maýsymnyń sońynda ne shildeniń basynda Úkimet qaraýyna jemqorlyq quqyq buzýshylyq pen qylmysty ashýǵa jáne onyń aldyn kesýge járdemdesken tulǵalardy kótermeleý erejesin engizip, bekittirip almaqqa nıet tanytyp otyr. Maqala «Zolotoı vek stýkacheı» degen taqyryppen berilgen.
