Polıtsııa qyzmetkerleri 13 saǵat tutqynda ustalǵan 45 jastaǵy júrgizýshini qutqardy - ІІM
ASTANA. Aqpannyń 24-i. QazAqparat /Rýslan Ǵabbasov/ - Almaty qalasynyń polıtsııa qyzmetkerleri 13 saǵat tutqynda ustalǵan 45 jastaǵy júrgizýshini qutqardy.
Bul týraly búgin Astanada ótken brıfıntge Іshki ister mınıstrliginiń Til saıasaty jáne aqparat departamentiniń bastyǵy Qýanyshbek Jumanov málim etti, dep habarlaıdy QazAqparat.
«Aqpannyń 22-sinde túnde jol polıtsııasy qyzmetkerleri kóliktik kezekshilik barysynda Lomonosov kóshesi boıynda kele jatqan, terezeleri qatty býlanyp ketken «Mazda» avtokóligin baıqaǵan. Polıtsııa qyzmetkerleriniń toqtaý týraly talaptaryn kólik júrgizýshisi elemeı, qozǵalysyn toqtatpaǵan. Avtomashına birneshe kósheden ótken soń májbúrlep toqtatyldy. Ol toqtasymen kóliktiń salonynan tórt adam qashyp shyqqan. Polıtsııa qyzmetkerleri júrgizýshini sol jerde ustady», dedi Q. Jumanov.
Ol buryn qaraqshylyq jasaǵany úshin sottalǵan Shyǵys Qazaqstan oblysynyń 33 jastaǵy turǵyny bolyp shyqty. «Salondy tekserý kezinde polıtsııa qyzmetkeri kóliktiń júk salǵysh bóliginen shyqqan shýdy estigen. Ony tekserý kezinde skotchpen baılanǵan er adamdy tapqan. Jábirlenýshi júk salǵyshta shamamen 13 saǵat jatqanyn aıtty», dedi ol.
Q. Jumanovtyń sózine qaraǵanda, birneshe mınýt ótkennen keıin sol mańaıdy tekserý barysynda polıtsııa qyzmetkerleri qylmysqa taǵy bir qatysýshysyn ustady. Onyń Qaraqalpaqstannan Qazaqstanǵa jumysqa turý maqsatynda kelgeni belgili boldy.Qazirgi ýaqytta olarǵa qatysty qaraqshylyq shabýyl jasaý faktisi boıynsha qylmystyq is qozǵalyp, qylmystyń basqa da qatysýshylary anyqtalýda.
