Polıtsııa qyzmetkeri zańsyz munaı satyp, qarý saqtaǵany úshin aıyptaldy
AQTÓBE. QazAqparat - Aqtóbede 85 myń lıter dızeldi otyndy zańsyz saqtap, satyp alyp, satqan qylmystyq toptyń isi sotqa jetti. Burynǵy polıtsııa qyzmetkeri Qazbek Álıev zańsyz munaı ónimderin satyp, qarý saqtaǵany úshin aıyptalyp jatyr, dep habarlaıdy QazAqparat tilshisi.
Mamyr aıynda qolǵa túsip, ýaqytsha tergeý qapasyna qamalǵan qylmystyq toptyń isi búgin №2 Aqtóbe qalalyq sotynda qarala bastady.
Іs materıalyna súıensek, sottalýshy Oral Bısembın osy jyldyń aqpan-mamyr aılary aralyǵynda Temir aýdanynda dızeldi otyn urlap satýshylardyń bar ekenin bilip, qylmystyq iske barady. Qazirgi ýaqytta dızeldi otyn urlap, satqandarǵa qatysty ózge is qozǵalǵan. Al sottalýshy O.Bısembın dızeldi otyndy qujatsyz alyp, ony Temir aýdanynyń Sarkól aýylyndaǵy turatyn Jolshara Salmaǵambetov arqyly tasymaldaıdy. Zańsyz dızeldi otyn tasý qylmystyq isi týraly Elek polıtsııa bólimi bastyǵynyń burynǵy orynbasary Qazbek Álıev bilip, iske ortaqtasady. Olar dızeldi otyndy Aqtóbe qalasyndaǵy «Taza Dala Kom» JShS qoımasynda saqtaıdy. «Taza Dala Kom» JShS-niń dırektory Oral Bısembın bastaǵan qylmystyq top osy jolmen barlyǵy 85 myń lıtrden astam qysqy jáne jazǵy dızeldi otyndy satyp alyp, satqan. Olarǵa Qylmystyq kodekstiń «Munaıdyń jáne munaı ónimderiniń shyǵarylý zańdylyǵyn rastaıtyn qujattarsyz olardy tasymaldaý, ıemdený, ótkizý, saqtaý, sondaı-aq munaıdy qaıta óńdeý» baby boıynsha aıyp taǵyldy. Qylmystyq toptyń arasynda «Daıa Kompanı» JShS dırektory Azamat Otarǵalıev te bar. Olar 85 myń lıterden astam dızeldi otyndy zańsyz satyp alyp, satqan. Jalpy quny - 12,7 mıllıon teńge.
Aıta keteıik, burynǵy polıtsııa qyzmetkeri Qazbek Álıev Aqtóbe qalasyndaǵy aıaldamalardyń birinde qara sómke taýyp alady. Sómke ishinen gaz tapansha jáne 40 rezeńke oń-dári tabylady. Ol tapqan qarýdy tirkeýge almaı, ózine saqtaǵan. Sot saraptama jasalyp, qarýdyń qoldanysqa jaramdy, jeke adamǵa tıesili ekenini anyqtaldy.
Qazbek Álıev Qylmystyq kodekstiń «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» baby boıynsha da jaýap beredi. Sot otyrysy kezinde sottalýshylardyń bári óz kinálaryn tolyq moıyndady. Tek sottalýshy Oral Bısembın taǵylǵan aıyppen ishinara kelispeıtinin aıtty. Sot otyrysy jalǵasyp jatyr.
