Polıtsııa qyzmetkeri úshin ustamdy bolý, azamattarmen til tabysa bilý de asa qajet - Baqytjan Asqarov
TÚRKІSTAN. QazAqparat – Іshki ister salasynda 24 jyldan beri eńbek etip kele jatqan Baqytjan Asqarov búginde Túrkistan oblystyq polıtsııa departamenti patrýldik polıtsııa basqarmasynyń aǵa ınspektory qyzmetin atqarady. Jumys barysynda kóbine kúzetiletin tulǵalarǵa jol bastap júretin azamat ýaqytpen sanaspaı qyzmet etýde, dep habarlaıdy QazAqparat tilshisi.
Qonaqtardyń arasynda qaýipsizdigi arnaıy zańmen bekitilgen tulǵalar men shetelden keletin týrıster de bar. Qıyn da ári jaýapty jumysty atqarý barysynda polıtseı áriptesi Qaırat Álibekov ekeýi kólik júrgizedi. Olar qonaqtardy mejeli jerge jetkenshe joǵary jyldamdyqty túsirýge jáne toqtaýǵa bolmaıdy.
«Jaýapty jumysty abyroımen atqarý biz úshin úlken mindet. Sondyqtan bar kúsh-jigerimizdi jumsaımyz. Kúzetiletin tulǵalardyń joldaǵy qaýipsizdigin saqtap, keptelisterge kezikpeı tez arada mejeli jerge jetkizýge tyrysamyz. Jolda júrgen soń, ártúrli oqıǵalarǵa kezdesemiz. Qıyndyqtardy qyzyqty jáıttar jeńip ketedi»,– deıdi polıtsııa aǵa leıtenanty.
Baqytjan Asqarov áriptesimen birge tańerteńnen keshke deıin kólikte júredi. Sondyqtan isher asty da kólikke salyp alady. Sebebi, toqtap tústenýge, keshki asty jaıbaraqat jeýge múmkindik joq. Jumys solaı. Ýaqytqa baǵynbaıdy. Túski mezgilde, keshki as ýaqytynda jolda bolýy ǵajap emes.
«Elbasymen, Premer-Mınıstrmen jáne ózge de mınıstrlermen birge júrdik. Sheteldik qonaqtardyń qasynda júremiz. Jolda árdaıym úlken jyldamdyqpen júremiz. Oqystan kólik shyǵyp qalatyn kezder kóp bolady. Ótken jyly Arys qalasynda tótenshe jaǵdaı bolǵan tusta dereý jolǵa shyqtyq. Basshylardyń kóliginiń aldynda biz júrip otyrdyq. Qıylystyń birinde jıgýlı kóligi eshqandaı belgi bermesten oqystan solǵa burylyp qaldy. Soǵysýǵa sál-aq qaldyq. Tájirıbeniń arqasynda kólik apatyna jol bermedik. Sońymyzdan kele jatqan basshylarda birden toqtap, jaǵdaıymyzdy bildi. Dereý kólikti otaldyryp, jumysymyzdy jalǵastyrdyq», – deıdi B.Asqarov.
Búginde Baqytjan Jumabaıulynyń qyzmet babynda qol jetkizgen marapattary kóp. Mınıstrlikten, oblys ákiminen alǵan alǵys hattary bar. Odan bólek memlekettik medalǵa da ıe bolǵan. Otbasynda jubaıy Janarmen úsh qyz, eki ul tárbıelep, ósirip otyr. Qazir eki nemeresi bar. Uly Maqsat onyń jolyn qýyp, Túrkistandaǵy patrýldik polıtsııada qyzmet atqarýda. Al, kelini Gúlnaz Shymkent qalasyndaǵy patrýldik bólimde eńbek etýde. Ekeýi de Almatydaǵy akademııada joǵary bilim alǵan.
«Polıtsııa qyzmetkeri bolý úshin bilim de, bilik te, bilek te kerek. Sabyr, tózim jáne qajyr-qaırat qajet. Shapshańdyq pen jyldamdyq, tez sheshim qabyldap, jyldam áreket ete bilý qabileti polıtseıge qajetti basty qasıetterdiń qatarynda. Ustamdy bolý men azamattarmen til tabysa bilý, sypaıy bolý da asa mańyzdy. Úıde ul-qyzyma, jumysta áriptesterime árdaıym bilgen keńesimmen bólisip otyramyn», – deıdi aǵa leıtenant.
