Polıtsııa qyzmetkeri men júrgizýshiniń tóbelesi ınternetke tarap ketti
Oqıǵa Jambyl dańǵyly men Mámbet batyr kóshesiniń qıylysynda bolǵan. Bolǵan jaǵdaıdy kýágerler túsirip alyp, áleýmettik jelide taratqan.
«Baǵdarshamnyń isten shyǵýyna baılanysty kólik keptelisi bastalǵan. Júrgizýshiler aıqaılasyp, onyń sońy tóbeleske ulasqan. Tártip ornatý úshin oqıǵa ornyna Taraz qalalyq ІІD Jol patrýldik polıtsııasynyń ınspektory kelgen. Jol qozǵalysyn retteý kezinde kólikterdiń birindegi jolaýshy salonnan shyǵyp, bylapyt sózder aıtqan. Jol-patrýldik polıtsııasy batalonynyń qyzmetkeri qyzmettik ádepti ustanyp, birneshe ret jol qozǵalysyn qamtamasyz etýge kedergi keltiretin áreketterin toqtatýyn talap etken», - dep atap ótti vedomstvodan.
Biraq, júrgizýshi polıtseıdiń sózine qulaq aspaı, qatty qarsylyq tanytqan. Keıin oǵan kúsh kórsetpek bolyp, tártip saqshysynyń jaǵasynan alǵan.
«Polıtsııa qyzmetkeri azamatty toqtatý maqsatynda «Quqyq qorǵaý qyzmeti týraly» QR Zańynyń 60-babyna sáıkes, sambo qoldanýǵa májbúr bolady. Inspektorlar qoǵamdyq tártip buzýshyny ustap, oblys ortalyǵyndaǵy bólimshege jetkizgen», - dep habarlady ІІD.
Departamentte atap ótkendeı, polıtsııa ýchaskesinde azamat óz kinásin tolyq moıyndap, ózin-ózi ustaı almaı qalǵanyn aıtqan. Ol polıtsııa qyzmetkerinen dóreki áreketi úshin keshirim surady. Oǵan qatysty ákimshilik hattama toltyryldy.