Polıtsııa qyzmetkeri qarýdy qoldanbas buryn eskertý jasap, baǵynýǵa ýaqyt berýge mindetteledi - QR ІІM
ASTANA. 20 maýsym. QazAqparat - Polıtsııa qyzmetkeri qarýdy qoldanbas buryn eskertý jasap, baǵynýǵa ýaqyt berýge mindetteledi.
Bul týraly búgin QR Parlamenti Májilisi Zańnama jáne sot-quqyqtyq reforma komıtetiniń kóshpeli otyrysynda QR Іshki ister mınıstri Qalmuhanbet Qasymov aıtty.
Mınıstrdiń atap ótýinshe, 2010 jyly qabyldanǵan quqyq qorǵaý qyzmeti týraly zańǵa sáıkes qazirgi ýaqytta qarý qoldanýdyń, sonymen qatar qorǵanýǵa qajetti jaǵdaıdaǵy negizi, sharty jáne tártibi, aıqyndalǵan. Degenmen, atalǵan zańda qyzmetkerdiń qarý qoldanýy úshin ǵana quqyq bar. Al qarýdy qoldanatyndyǵyn eskertý qarastyrylmaǵan.
«Biz usynyp otyrǵan norma zańmen kózdelgen qarýdy qoldanýdyń qoldanystaǵy negizin keńeıtpeıdi, kerisinshe qyzmetkerge qarýdy qoldanǵanǵa deıin ony qoldanýǵa oqtalyp turǵandyǵyn eskertý mindeti júkteledi. Bul halyqaralyq talaptarǵa qaıshy emes», - dedi Q.Qasymov. Mınıstrdiń sózine qaraǵanda, quqyqtyq tártipti qamtamasyz etý barysynda laýazymdy tulǵanyń qarý nemese kúsh qoldanýy kezinde quqyq qorǵaý organdarynyń qyzmetkerleri naqty eskertý jasaýy ári oǵan baǵynýǵa ýaqyt berýi qajet.
«Bul talaptar, eger qolǵa túsirý laýazymdy tulǵanyń nemese basqa da tulǵalardyń ólimine ne bolmasa aýyr jaraqattanýyna ákeletindeı jaǵdaı bolǵanda qoldanylmaıdy», - dedi ol.
