Polıtsııa qyzmetkeri qaǵyp ketken stýdent qyzyl dıplomnan úmitker bolǵan
QARAǴANDY. QazAqparat - Ótken túnde «Mersedes» avtokóligi qaǵyp, mert bolǵan E.Býketov atyndaǵy Qaraǵandy memlekettik ýnıversıtetiniń tórtinshi kýrs stýdenti bir aıdan keıin qyzyl dıplom almaqshy bolǵan, dep habarlaıdy «QazAqparat» HAA tilshisi.
«Biz túnimen oqıǵa ornynda boldyq. Jaǵdaıdyń bulaı bolǵandyǵy ókinishti. Araılym oqýda ozat, ózgelerge úlgi stýdent boldy. Jataqhana aımaǵyndaǵy osy jaıaý júrginshilerdiń joly kózge kórinbeıtin jerge ornalasqan. Jol óte keń. Sol túni onyń qasynda qatarlas toptaǵy kýrstasy bolypty. Ol da ábden shoshynyp qalǵan», - deıdi QarMÝ tárbıe jáne áleýmettik jumystar jónindegi prorektory Abaı Qalyqov.
Araılym Isataı jataqhanada turǵan. Sol túni ol dúkennen jataqhanaǵa qaıtyp kele jatqan.
Aıta keteıik, 16 mamyr kúni saǵat 22-00-der shamasynda Ýnıversıtetskaıa jáne Muqanov kósheleriniń qıylysynda ýchaskelik polıtsııa ınspektorynyń kómekshisi jaıaý júrginshini qaǵyp ketken. Osy oqıǵa boıynsha QK 345 babynyń 3 taraýy negizinde sotqa deıingi tergeý amaldary júrgizilip jatyr.
