Polıtsııa qyzmetkeri ań aýlap júrip qasyndaǵy serigin atyp óltirdi
NUR-SULTAN. QazAqparat – Polıtsııa qyzmetkeri ań aýlaýǵa shyǵyp, qasyndaǵy serigin atyp alǵan, – dep habarlaıdy Polisia.kz.
Aqtóbe oblystyq Polıtsııa departamentiniń Ózindik qaýipsizdik basqarmasy QR QK-niń 104-baby 1-bóligi (Abaısyzda qazaǵa ushyratý) boıynsha qylmystyq isti tergep jatyr.
3 qyrkúıek kúni Hromtaý aýdanynyń kezekshi bólimine er adam ań aýlaý kezinde óziniń tanysyn baıqaýsyzda atyp alǵany týraly habarlama kelip tústi.
Polıtsııa qyzmetkeri demalys kúninde tanysymen ańshylyqqa barǵan. Ań aýlaý kezinde baıqaýsyzda ózine tıesili qarýmen qasyndaǵy serigin atyp alǵan. Sonyń saldarynan ol oqıǵa ornynda kóz jumǵan.
Kúdikti QR QPK-niń 128-babyna sáıkes ýaqytsha ustaý ızolıatoryna qamaýǵa alyndy.
