Polıtsııa qyzmetine kelýshiler qatary 4 ese artty – Marat Ahmetjanov

ASTANA. QazAqparat – Polıtsııa organdarynda kadrlardyń turaqtaý kórsetkishi 42%-ǵa jetti. Bul týraly QazAqparat tilshisiniń saýalyna jaýap bergen Іshki ister mınıstri Marat Ahmetjanov málim etti, dep habarlaıdy QazAqparat tilshisi.

«Kadr tapshylyǵy máselesin sheshý - «Qoǵammen áriptestikte qoǵamdyq qaýipsizdikti qamtamasyz etý» tujyrymdamasynyń bir baǵyty. Bul rette biz jumysty ózimizden (mınıstrlik – avtor túsindirmesi) bastadyq. Polıtsııa organdaryna qatysty qabyldanǵan is-sharalardyń arqasynda 42%-ǵa kadr aýyspalylyǵy toqtady. Polıtsııaǵa kelemin degen adamdar qatary 4 ese artty. Buǵan Prezıdenttiń tikeleı tapsyrmasy áser etti. Atap aıtqanda, qyzmetkerlerdiń alatyn aılyǵyn ósirý jáne basqa da kótermeleý sharalary qabyldandy», - dep jaýap berdi vedomstvo basshysy tilshi saýalyna oraı.

Qosa ketsek, buǵan deıin Ashyq NQA portalynda jarııalanǵan atalǵan tujyrymdamada kadr tapshylyǵy máselesi ózekti baǵyttardyń biri retinde kórsetilgen. Sonymen qatar, polıtsııa qyzmetkerleriniń jalaqysy óskenimen, ol ınflıatsııa áserinen sezilmeı otyrǵany da aıtylǵan.