Polıtsııa qyzmetinde jol qozǵalysyn retteıtin taıaqshanyń paıda bolǵanyna ǵasyrdan asqan
PETROPAVL. QazAqparat – Soltústik Qazaqstan oblysy polıtsııa departamentiniń mýzeıinde jol qozǵalysyn retteıtin taıaqshanyń san alýan túri saqtalǵan, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Memavtoınspektsııaǵa arnalǵan stendtiń sóresine taıaqshanyń 4 túri qoıylǵan. Kózge qarapaıym kóringenimen, polıtsııanyń kómekshi quraldarynyń tarıhy baı. Ony qoldanysqa alǵash ret Sankt-Peterbor polıtseıleri 102 jyl buryn engizgen eken.
«Ol kezdegi taıaqshalar búgingiden ózgesheleý bolǵan, birinshi ereksheligi – uzyndyǵy shamamen bir metrge jetken. Túsi – aq, onyń kómegimen eki belgi beriletin: ekıpajǵa nusqaý arqyly toqtatý jáne taıaqty joǵary kóterip, barlyq jol qozǵalysyna qatysýshylardy toqtatý», - deıdi mýzeı meńgerýshisi Lıýbov Osınskaıa.
Keńestik dáýirde taıaqtyń túsi qyzylǵa ózgerdi, bul onyń jaqsy kórinýi úshin jasaldy. Alaıda, keıin tájirıbe barysynda adam aq pen qara tústiń úılesimin jaryq mólsherine qaramastan jaqsy kóretindigi anyqtaldy. Jeti jyl boıy qoldanysta bolmaǵan taıaqshalar 1939 jyldyń basynda aq-qara túspen qaıtaryldy.
«1963 jyly taıaqshalar ekinshi ret qoldanystan alyndy. Alaıda, alty jyldan keıin kólikterdiń legi ósip, MAI qyzmeti jańartyldy jáne taıaqshalar qoldanysqa qaıtaryldy. Onyń burynǵylardan tek tamshy tárizdes túri ǵana ózgeshe boldy. Dál osy taıaqsha Petropavl joldarynda alǵash ret paıdalana bastady», - deıdi Lıýbov Osınskaıa.
Keıin taıaqshanyń negizi aǵashtan plastıkke almastyryldy, jaryqtandyrý, jaryq shaǵylystyrǵysh boıaýlar paıdalanyldy. Pishini de qaıtadan tsılındrli boldy. Qoldanystaǵy jaryǵy bar qyzyl taıaqsha búgingi kúnge jetildirilip jetken úzdik úlgisi.
Mýzeı qyzmetkeriniń sózine qaraǵanda, uzaq ýaqyt boıy qarapaıym taıaqshalarmen qatar, qoldanysta katafottarmen jabdyqtalǵan dıskili taıaqshalar bolǵan. Alaıda ony kópshilik bile bermeıdi. Al Ekinshi Dúnıejúzilik soǵys kezeńiniń sýretterinde shınel kıgen qyzdardyń áskerı kolonnalardy jalaýshalardyń kómegimen rettegenin kórýge bolady.
«Jol qozǵalysyn retteý quraldary san alýan bolǵan. Biraq kórsetiletin belgilerdiń sany bir ǵasyrdyń ishinde aıtarlyqtaı kóbeıgen joq, olar úsheý - «Nazar aýdar», «ońǵa qaraı júrý» jáne «barlyq baǵytqa júrý». Ókinishke oraı, jol qozǵalysyna qatysýshylardyń barlyǵy derlik atalǵan belgilerge den qoıa bermeıdi», - deıdi Petropavl qalalyq PB patrýldik polıtsııa batalony bastyǵynyń mindetin atqarýshy Qanat Álimjanov.
1 qyrkúıekten polıtseıler joldaǵy qozǵalysty qaıtadan taıaqshamen retteýge kóshti. Taıaqshalardyń kómegine tártip saqshylary úsh jaǵdaıda: baǵdarsham isten shyqqanda, kólik keptelisi bolǵanda jáne jol-kólik oqıǵasy kezinde júginedi. Polıtseıler júrgizýshilerdi jáne jaıaý júrginshilerdi retteýshiniń belgilerin jetik bilý qajettigin eskertedi.
