Polıtsııa kúni: ShQO-da tártip saqshylarynyń mergendigi synaldy
ÓSKEMEN. QazAqparat – Shyǵys Qazaqstan oblysynda Qazaqstan polıtsııasy kúnine oraı jaýyngerlik qarýdan oq atý boıynsha týrnır ótkizildi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, oblystyń qalalary men aýdandarynan kelgen polıtseılerdiń qatysýymen ótken sharada karantındik shekterleý qatań saqtaldy.
«Jarysqa 9 komanda qatysty, atap aıtqanda polıtsııa departamentiniń apparaty, Óskemen qalalyq PB, Ertis, Úlbi, Sol jaǵalaý polıtsııa bólimderi, PD patrýldik polıtsııa batalony, Óskemen qalalyq PB patrýldik polıtsııa batalony, sondaı-aq Ulan jáne Glýbokoe aýdandyq polıtsııa bólimderi. Saqshylar jattyǵýdyń 3 túri boıynsha jarysqa túsken», - dedi Arnaıy jáne jumyldyrý daıyndyǵy basqarmasynyń bastyǵy Merhat Dıýsýpov.
Týrnırdi ótkizý qorytyndysy boıynsha birinshi oryndy ShQO PD apparatynyń komandasy, ekinshi oryndy Óskemen qalalyq PB apparaty, úshinshi oryndy oblystyq PD BPP ıelendi. Jeńimpazdar jeke jáne komandalyq esepte medaldarmen, gramotalarmen jáne baǵaly syılyqtarmen marapattaldy.
