Polıtsııa kúni: Aǵaıyndy Ybyraevtar áke jolyn jalǵap keledi
PETROPAVL. QazAqparat – Soltústik Qazaqstan oblysynda 40 shaqty erli-zaıypty polıtsııada eńbek etse, dınastııalardyń sany júzden asady. Solardyń biri – Taıynsha aýdanyndaǵy Ybyraevtar úıelmeni, dep habarlaıdy QazAqparat tilshisi.
Dáýren, Erlan jáne Erjan Ybyraevtar - Taıynsha aýdanynyń polıtsııa bólimi bastyǵynyń jedel jumys jónindegi orynbasary, ýchaskelik polıtsııa ınspektory jáne tergeýshi. Memlekettik qyzmette týǵan-týystar bir-biriniń qaramaǵynda jumys istemeý kerek, sondyqtan aǵaıyndylar túrli bóliniste qyzmet atqarady. Bastary jumys barysynda tek tergeý sheńberinde ǵana qosylady.
Aǵaıyndy Ybyraevtardyń ákesi Máýlı ómir boıy memlekettik avtoınspektsııada jumys istedi. Ol 1999 jyly 44 jasynda zeınetke shyǵysymen dúnıeden ozdy, tórt balasynyń úsheýiniń forma kıip, ofıtser atanǵanyna qýanyp ta úlgermedi. Biraq balalary ákesiniń kózi tirisinde-aq tańdaýlaryn jasap qoıǵan. Analary Qalampyr – pedagog, tórtinshi baýyrlary Nurjan, anasynyń jolyn qýyp, Taıynsha orta mektebinde sýret pen syzýdan sabaq beredi.
Analarynyń úıi - barlyǵy qaýyshatyn qasıetti shańyraq. Polıtsııa qyzmetinde sırek bolatyn demalystary sáıkes kelgende baýyrlar otbastarymen osy jerden tabylady.
«Balalarymyzdyń qaısysynyń ata jolyn qýatynyn bilmeımiz, olardyń mamandyq tańdaýlaryna aralaspaımyz. Tek olardyń qoǵamǵa adal qyzmet etetin laıyqty azamat bolyp óskenin qalaımyz. Bizdi de ákemiz solaı tárbıelegen: eń mańyzdysy - isińe, elińe adal bolý. Ákem «quqyq qorǵaýshylar – halyq qyzmetshileri, azamattarǵa kómek kórsetý jáne qorǵaý olardyń mindeti» dep árdaıym aıtyp otyratyn», - deıdi aǵaıyndylardyń úlkeni Erlan.
Erlan Chermoshnıanka aýyldyq okrýginiń ýchaskelik polıtsııa ınspektory, polıtsııa maıory sheninde.
2018 jyly qarasha aıynda Novo-Ivanovka aýylynda órt boldy. Kórshisiniń úıinen tútindi baıqaǵan áıel, birden Erlan Ybyraevqa qońyraý soqqan, tek sodan keıin «101» habarlaǵan. Abyroı bolǵanda, osy kezde Erlan qutqarýshy joldasy Oleg Solodkomen birge bolǵan. Oqıǵa ornyna órt sóndirýshilerden buryn jetken eki dos órtenip jatqan úıden 65 jastaǵy turǵyndy alyp shyǵyp, jasandy dem aldyrý jasady. Turǵyndardyń óz ýchaskelik ınspektoryn jaqsy bilýi adam ómirin aman alyp qalýǵa septigin tıgizdi.
Osy batyldyǵy úshin Erlan «Erligi úshin» medalimen marapattaldy jáne soltústikqazaqstandyq polıtseılerdiń ishinde alǵashqy bolyp el Prezıdenti Qasym-Jomart Toqaevtyń qolyn aldy. Saltanatty marapattaýdaǵy fotosýretter búginde aýdandyq polıtsııa bóliminiń mýzeı bólmesinen oryn aldy. Aǵaıyndy polıtseıler mýzeıge ákeleriniń jetonyn, jezlyn jáne fotosýretterin de tapsyrdy.
«Bul jádigerler qyzmet pen ómirimizdiń arasyn baılanystyratyn taǵy bir qural, olardy bir-birinen ajyratyp elestetý qıyn. Polıtsııa bólimi biz úshin – balalyq shaqtyń bir bóligi. Biz munda jańa jyl meıramynda túrli-tústi oıynshyqtarmen bezendirilgen shyrshaǵa keletinbiz. Ákem dombyrada, gıtarada jaqsy oınaıtyn, men qosylyp án aıtatynmyn, birge kórkemónerpazdar baıqaýyna qatysatynbyz. Bizdi tipti, oblystyq baıqaýǵa da shaqyrǵan, ákem jumysyn tastap kete almaǵan soń, qatyspadyq. Meniń balalarym ósken soń polıtsııa qyzmeti jaıly ne aıtatynyn bilmeımin, biraq jaqsy oı qalyptasady degen senimdemin», - deıdi Erlan.
Erlan mamandyqta ǵana emes, ómirlik serigin tańdaýda da ákesine uqsaǵan. Onyń jary Dıana – muǵalim. Aıta keteıik, SQO PD bólinisterinde 50-ge tarta polıtsııa qyzmetkeri ómirin ustazdarmen baılanystyrǵan. Jalpy óńirde pogondy erli-zaıyptylar 40 shaqty bolsa, barlyǵy 100-den astam otbasylyq áýlet qyzmet atqarady.
