Polıtsııa kúdikti baǵdarlamalardy telefonǵa júktemeýge shaqyrady
ASTANA. QazAqparat - Polıtsııaǵa qala turǵyndarynan ınternet alaıaqtardyń qurbany bolǵany týraly aryz kelip tústi, dep habarlaıdy astana ákimdiginiń resmı saıty.
Astana ІІD-ne jergilikti bir turǵynnan belgisiz jolmen aqsha ıemdengeni týraly aryz kelip tústi. Qazir alaıaqtyq faktisi boıynsha sotqa deıingi tergeý júrgizilýde.
«Maýsym aıynyń sońynda mobıldi baılanyspen túrli ınternet saıttarǵa kirgen qyz belgisiz siltemege tap bolady. Ony basqan kezde tabloǵa QR ІІM kıberqylmys jónindegi basqarmasynyń atynan saıtqa kirgeni úshin kıvı-ámııanǵa aıyppul tóleý kerektigi týraly eskertý shyǵady. Boıjetken eshteńeden kúdiktenbesten kıvı-ámııanǵa aqsha aýdarady», - delingen resmı habarlamada.
Astana ІІD krımınaldyq polıtsııa bóliminiń basshysy Talǵat Bólegenovtiń aıtýynsha osy tektes alaıaqtyq derbes kompıýterlerde de qoldanylady.
«Vırýs túsken kompıýter ınternet-resýrsty paıdalanyp otyrǵan adamǵa keri jiberilip, onyń braýzerin bloktap tastaıdy. Monıtorda QR ІІM kıberqylmys jónindegi basqarmasynyń atynan mátin shyǵady da, zańdy buzǵany týraly habarlaıdy. Blokty ashý úshin termınal arqyly 6 myńnan 15 myń teńgege deıin aıyppul tóleýin talap etedi»,- dedi ol.
Osyǵan baılanysty tártip saqshylary qala turǵyndarynan qandaı jaǵdaı bolmasyn tólem jasamaý kerektigin eskertedi.
«Esterińizde bolsyn, memlekettik organdar azamattardyń kompıýterin (nemese smartfonyn) bloktamaıdy. ІІM-niń taratylyp jatqan bul habarlamaǵa qatysy joq», - delingen ІІD baspasóz qyzmetinde.
Eger tólem jasap qoıǵan bolsańyz onda termınaldan alǵan chegińizdi saqtap qoıyp, polıtsııaǵa aryz jazǵanda qosa tapsyryńyz.
Internet-alaıaqtarǵa qurban bolmas úshin polıtseıler kompıýterge nemese smartfonǵa kúdikti baǵdarlamalardy júktemeýdi jáne túrli resýrstarǵa kirmeýdi, tereze betine shyǵyp turǵan mazmuny kúdikti jarnama bannerlerin ashpaýdy eskertedi. Eger kartınka paıda bolǵan jaǵdaıda mobıldi baılanysty nemese kompıýterdi qaıtadan júkteýge jiberip, vırýstyń bar-joqtyǵyn tekserý qajet.
