Polıtsııa kópirden sekirmek bolǵan elordalyq áıelge ákimshilik hattama toltyrdy
ASTANA. QazAqparat – Búgin elordada Mınıstrlikter úıi mańyndaǵy kópirden sekirmek bolǵan áıeldiń nelikten mundaı áreketke barǵany belgili boldy, dep habarlaıdy QazAqparat tilshisi.
«Mán-jaıdy anyqtaý barysynda áıel bul áreketimen kámeletke tolmaǵandardyń isteri jónindegi mamandandyrylǵan aýdanaralyq sotynyń úkimimen kelispeıtinin kórsetpekshi bolǵan.
Bıyl 6 sáýirde sot organy QR Qylmystyq kodekstiń 191-babynyń 2-bóligi (Tonaý) jáne 192-babynyń 3-bóligi (Qaraqshylyq) boıynsha sottaǵan kámelettik jasqa tolmaǵandardyń biri onyń uly ekeni anyqtaldy. Sonymen qatar, qoǵamdyq tártipti buzýshyǵa qatysty Ákimshilik quqyq buzýshylyq kodeksiniń 434-baby boıynsha (Usaq buzaqylyq) ákimshilik hattama toltyryldy», - dep málim etti Astana qalalyq polıtsııa departamentinen.
Eske salaıyq, búgin 12:20 shamasynda elordalyq áıel Astanada Mınıstrlikter úıi mańyndaǵy kópirden sekirmek boldy. Oqıǵa ornyna dereý jetken elordalyq qutqarýshylar ony satysy bar arnaıy tehnıkanyń kómegimen túsirip aldy.
