Polıtsııa Kókshetaýdaǵy mektepterdi tekserip jatyr

ASTANA. QazAqparat - Jarylǵysh qurylǵylardyń salynǵany týraly habarlama alǵan polıtseıler Kókshetaý qalasynyń mektepterin tekserýde, dep habarlaıdy QazAqparat Polisia.kz saıtyna silteme jasap.

Saıttaǵy málimetterge qaraǵanda, 28 qazanda Polıtsııa basqarmasynyń Jedel basqarý ortalyǵyna №3 «Daryn» mektep-ınternatynda jarylǵysh qurylǵy jasyrylǵany týraly habarlama kelip túsken.

«Kórsetilgen mekenjaı boıynsha polıtsııa qyzmetkerleri men basqa da shuǵyl qyzmetter dereý kelip jetti. Mektep aýmaǵy qorshaýǵa alyndy. Oqýshylar, oqytýshylar quramy jáne mektep ákimshiligi evakýatsııalandy.

Jarylys tehnıkteri men kınologtar mektepti tolyq zerttedi, jarylǵysh qurylǵylar tabylǵan joq.

Keıinnen polıtsııaǵa basqa orta oqý oryndarynda jarylǵysh qurylǵylar bar ekendigi týraly habarlamalar kelip tústi, onda tıisti qyzmetter tekserý jumystaryn júrgizýde.

Polıtsııa azamattardan dúrbeleńge túspeýdi, jalǵan aqparat taratpaýdy jáne tek resmı aqparatqa senýdi suraıdy»,-delingen habarlamada.