Polıtsııa qazaqstandyqtardan alys jolǵa shyǵý josparyn shegere turýdy suraıdy
NUR-SULTAN. QazAqparat – QR Іshki ister mınıstrligi qazaqstandyqtardy alys saparǵa shyǵýdy keıinge qaldyryp, jol ústinde asa saq bolýyn suraıdy, dep habarlaıdy QazAqparat tilshisi.
«Polıtseıler júrgizýshilerge kólik tizgininde asa jiti bolýdy, qaýipsiz qashyqtyq pen jyldamdyqty saqtap, shuǵyl toqtaý kezinde saq bolýdy ótinedi. Jaıaý júrginshilerdiń de abaılaǵany abzal, sebebi kóktaıǵaq kezinde kólikterge shuǵyl toqtaý qıynǵa túsip jatady», - degen jazba jarııalandy mınıstrliktiń Instagram-daǵy paraqshasynda.
Qardyń qalyń túsýine baılanysty quqyq qorǵaýshylar azamattardan josparlanǵan alys jolǵa saparyn shegere turýdy suraıdy. Al saparǵa shyǵý mindetti bolǵan jaǵdaıda qaıda bara jatqanyn týǵan-týystaryna aıtyp ketken jón.
«Jyldamdyqty, qaýipsiz qashyqtyq pen búıir jaqtaǵy aralyqty tańdaǵan kezde aýa raıynyń ahýalyn eskergen durys. Qar jaýyp turǵan kezde joldy kórý qıyndaı túsedi», - delingen habarlamada.
