Polıtsııa qarasoranyń jasyrylǵan egisterin tikushaq arqyly anyqtady
ASTANA. QazAqparat - 8 mln. astam marıhýananyń bir rettik dozasynyń zańsyz aınalymǵa túsýine jol berilgen joq. Bul týraly QR Іshki ister mınıstrliginiń málimetinde habarlandy.
«ІІM Esirtki bıznesine qarsy kúres departamenti «Kóknár» jedel-profılaktıkalyq is-sharasy barysynda shilde-tamyz aılarynda elimizdiń óńirlerindegi qosymsha kúsh-quraldardy, Ulttyq Ulannyń «Búrkit» arnaıy bólinisin tartý arqyly elimizdiń ońtústik óńirlerinde quramynda esirtki bar ósimdikterdi zańsyz egip-ósirý plantatsııalaryn anyqtaý jáne jolyn kesý boıynsha múltiksiz sharalar qabyldandy», - dep atap ótti ІІM Esirtki bıznesine qarsy kúres departamentiniń bastyǵy Sultan Qusetov.
Qarasoranyń pisip-jetilýi mezigilinde mundaı operatsııalardyń ýaqtyly ótkizilýi óz nátıjelerin berdi. Aǵymdaǵy jylǵy tamyzda polıtsııa qyzmetkerleri qarasorany zańsyz egip-ósirýge qatysy bar 25 adamdy ustady. 50 gektardan asatyn jalpy aýmaqta ósirilgen qarasoranyń 49 plantatsııasy anyqtaldy, osy ósimdiktiń 34 myń sabaǵy tárkilendi. Olardyń jalpy salmaǵy 41 tonnany quraǵan.
8 mln. astam marıhýananyń bir rettik dozasynyń zańsyz aınalymǵa túsýine jol berilgen joq.
Barlyq faktiler boıynsha Qylmystyq kodekstiń «Quramynda esirtki zattar bar, ósirýge tyıym salynǵan ósimdikterdi zańsyz egip-ósirý» 300-baby boıynsha qylmystyq is qozǵaldy. Olar boıynsha úsh jyldan segiz jylǵa deıingi merzimge bas bostandyǵynan aıyrý jazasy kózdelgen.
Vedomstvonyń málimetinshe, qylmyskerler quramynda esirtkisi bar ósimdikti ósirý úshin alqaptardy daıyndaý kezinde kóbinese aýyl sharýashylyǵy mamandaryn qatystyrǵan, sondaı-aq qylmystyq áreketti jasyrýǵa múmkindik beretin barlyq faktorlardy qoldanǵan. Qarasora joldardan jáne halyq ornalasqan jerlerden alshaq aımaqtarda egilgen, mundaı alqaptardy joǵary ótimdiligi bar avtokólikterdi qoldansa da izdep tabý múmkin emes. Osy oraıda qarasorany egip-ósirý aýmaqtaryn tek tikushaqty qoldaný arqyly tabýǵa bolady.
