Polıtsııa Qaraǵandy fırmalarynyń birinde oq-dárilerdi joıý kezinde bolǵan jarylysqa baılanysty tergeýaldy tekserister júrgizýde

Bul týraly Qaraǵandy oblystyq ІІD baspasóz qyzmeti habarlady.

«Soltústik óndiristik aımaqta ornalasqan JShS-te gazdánekerleý jumystaryn júrgizý kezinde oryn alǵan jarylys boıynsha tergeýaldy tekserister júrip jatyr. Onyń nátıjeleri boıynsha protsessýaldyq sheshim qabyldanady», - delingen oblystyq ІІD baspasóz qyzmeti taratqan habarlamada.

Osyǵan deıin habarlanǵandaı, Qaraǵandy qalasynda burynǵy shahtanyń aýmaǵynda snarıadtyń gılzasyn joıý maqsatynda júrgizilgen gazben dánekerleý jumystary barysynda jarylys bolyp, bir adam zardap shekti.

Soltústik óndiristik aımaqta ornalasqan shahta «DA-IN» JShS-ǵa tıesili. QR Tótenshe jaǵdaılar mınıstrliginen anyqtaǵanyndaı, dánekerleý jumystaryn júrgizý kezinde atalmysh snarıadtyń kapsıýli iske qosylǵan. Sonyń saldarynan «DA-IN» JShS-nyń 56 jastaǵy jumysshysy túrli jaraqattarmen aýrýhanaǵa jetkizildi.

Tótenshe jaǵdaıdy joıýǵa shuǵyl áreket etý qyzmeti, sonyń ishinde QR TJM Qaraǵandy oblysy boıynsha TJD-nyń 15 adamy men 3 tehnıkasy jumyldyryldy.

Arnaıy is-sharalardy júrgizý barysynda, shahtada jarylmaǵan oqtumsyqtar bolǵany anyqtaldy. Qazir olardyń tańbalanýy men sany anyqtalýda. Artıllerııalyq gılzalar men oqtumsyqtardy joıý jumystary aıaqtalǵansha shahtaǵa polıtsııa jáne QR Qorǵanys mınıstrliginiń №31775 áskerı bólimshesiniń qyzmetkerlerinen quralǵan kúzet qoıyldy.