Polıtsııa kapıtany Rozovka aýylyndaǵy jarylystan úsh adamdy qutqardy
ASTANA. QazAqparat - Pavlodar oblysynda Rozovka aýylyndaǵy úılerdiń birinde túnde bolǵan órt saldarynan 63 jastaǵy úı ıesi men onyń 23 jastaǵy nemeresi, Óskemennen kelgen 30 jastaǵy uly aman qaldy.
Alǵashqy bolyp jetken "Kırova" JShS-ne tıesili tehnıkanyń ózi órtenip kete jazdaǵan, dep habarlaıdy pavlodarnews.kz.
Adamdar men órt sóndirý kóligin polıtsııa kapıtany, Rojdestvensk aýyldyq okrýginiń ýchaskelik ınspektory Baýyrjan Bıdaev qutqaryp qaldy.
«Men qujattarmen jumys istep jatqan edim. Tirek aýylynan túngi saǵat on eki jarymnyń kezinde shyqtym. Kóshede bireý qarýmen oq atyp jatqandaı dybys estildi. Qyzmettik kólik arqyly kósheni aralap shyǵýdy jón kórdim. Sol sátte aýyl ákimdiginiń janynda saraı men úıge japsarlas ornalasqan shatyrdyń janyp jatqanyn kórip qaldym»,- deıdi Baıyrjan Bıdaev. Úıge jaqyndaǵannan keıin polıtsııa kapıtany terezeni qaǵa bastaǵan. Degenmen ár jaqtan eshbir belgi bolmaǵan. - Aýlaǵa kireıin dep edim, ishinen bekitip jaýyp alǵan eken. Sharbaq arqyly sekirip túsýge týra keldi. Kireberis esikke bet alǵanymda úı ıeleriniń turǵanyn kórdim. Olar meniń terezeni qaqqanymdy múldem estimegen, - deıdi ol. Janyp jatqan úıdi ıeleri tastap ketkennen keıin polıtsııa kapıtany qyzmettik kólikpen jáne kórshilerdiń kómegimen órt sóndirý tehnıkasyn aýladan ıterip shyǵarǵan. Sol sátte úıde gaz ballony jarylǵan. "Zernograd" JShS-niń ekinshi órt sóndirý kóligi tilsiz jaýdy tolyǵymen sóndirgenge deıin jumys istedi. Budan basqa, oqıǵa ornyna №35 ÓB-nen eki bólim jumyldyryldy. Jalyn 120 sharshy metr aýmaqty sharpyǵan. Aýdandyq TJ bóliminiń aqparatyna súıensek, órttiń shyǵýyna otty abaısyz qoldaný sebep bolǵan. Degenmen sońǵy naqty málimet saraptama qorytyndysynan keıin belgili bolmaq.
