Polıtsııa ınternet arqyly eń kóp jasalatyn qylmys túrlerin atady
ÓSKEMEN. QazAqparat – Óskemen qalalyq Polıtsııa basqarmasy ınternette jıi kezdesetin alaıaqtyqtyń 5 túrin atady, dep habarlaıdy QazAqparat.
Birinshi orynda ózin bank qyzmetkeri retinde tanystyratyn alaıaqtar tur. Bári aldyn ala oılastyrylǵan jospar boıynsha iske asady. Jábirlenýshige qońyraý shalǵan alaıaq «sizdiń shotyńyzdan aqsha aýdarylǵan» deıdi. Buǵan sengen azamattar ózderiniń jeke málimetterin aıta salyp, bank kartasyndaǵy aqshalarynan aıyrylyp qalady. Shaharda dál osyndaı tuzaqqa túskenderge jalpy somasy 21 mıllıon 682 myń teńge mólsherinde shyǵyn kelgen.
«Aldanǵandardyń kóbi 40-tan asqandar. Alaıaqtar olarǵa qońyraý shalǵan kezde «shotyńyzdy bireý ashyp aldy» dep qorqytady. Muny estigende úreılengen adam barlyq derekterdi aıta salady, tipti kartanyń nómirin ǵana emes, artyndaǵy úsh tańbaly kodty da aıtady. Qandaı jaǵdaı bolsa da bul málimetterdi qupııa ustaý kerek. Óıtkeni osy derekterdi bilgen adam shottan aqshany op-ońaı sheship ala alady», - dedi dedi qalalyq Polıtsııa basqarmasy bastyǵynyń orynbasary Ǵalymbek Turysbekov.
Ekinshi oryndy Kolesa.kz saıtyndaǵy alaıaqtar aldy. Avtokólik nemese qosalqy bólshek satatyndyǵy týraly habarlandyrý jarııalaǵan ákkiler qyzyǵýshylyq tanytqandarǵa aldyn ala tólem jasaý qajettigin aıtady. Bundaı arbaýǵa ilikken turǵyndar 15 mln teńgelerinen aıyryldy.
«Úshinshi orynda – «Kásibińizdi damytýǵa kómektesemiz» deıtin alaıaqtar. Osy ádispen jurtty aldaıtyndardyń kóbi adam psıhologııasyn jaqsy meńgergen. Jábirlenýshilerdiń biri tabysyn arttyramyn dep mıllıon teńgeden astam qarajatynan aıyrylyp qaldy. Óskemendikterge jalpy keltirilgen shyǵyn mólsheri – 11 mıllıon 785 myń teńgeni quraǵan», - dedi Ǵalymbek Turysbekov.
Shaǵyn nesıelik uıymdarda qala turǵyndary 9 mıllıon 151 myń teńge shyǵynǵa batty. Pandemııa kezinde qıyn jaǵdaıǵa tap bolǵandar kiristi teksermeı qajetti somany beretin uıymdarǵa jıi júgingen. Alaıda nesıeni tólep bitkennen keıin klıenttiń áli de birshama qaryzy bar bolyp shyǵady. Óıtkeni qaryz alýshynyń málimetterine qol jetkizgen alaıaqtar onyń atynan ınternette taǵy nesıe rásimdep otyrǵan.
Internette jıi kezdesetin besinshi alaıaqtyq – OLX saıtynda jáne Instagram jelisindegi saýda-sattyq. Budan keltirilgen shyǵyn mólsheri – 7 mıllıon 474 myń teńge.
