Polıtsııa ǵımaraty aldyndaǵy drıft: Júrgizýshi ustaldy
Petropavl qalasynyń Jumabaev kóshesinde ornalasqan polıtsııa basqarmasynyń ǵımaraty aldynda Lada Granta júrgizýshisi drıft jasap júrgen vıdeo áleýmettik jelilerde tarady. Jeli qoldanýshylarynyń sózinshe, 18 tamyz kúni, saǵat 03.30-da kólik 20 mınýt boıy ǵımarat aldynda shyr aınalǵan.
Polıtseıler júrgizýshini izdep tapty.
«Іzdestirý is-sharalary barysynda patrýldik polıtsııa batalonynyń qyzmetkerleri avtokólikti Pestroe kóliniń mańyndaǵy saıajaı ýchaskeleriniń birinen tapty. Kóp uzamaı júrgizýshi de ustaldy. Ol oblys ortalyǵynyń 42 jastaǵy turǵyny bolyp shyqty.
Er adam kólik tizgininde ózi bolǵanyn rastady. Bulaı jasaýyna jeke ómirindegi qıynshylyqtarǵa baılanysty týyndaǵan emotsııalyq kúızelis sebep bolǵanyn aıtty.
Júrgizýshige qatysty QR Ákimshilik quqyq buzýshylyq týraly kodeksiniń 596, 590, 591, 593 jáne 595-baptary boıynsha hattamalar toltyryldy.
Bes baptyń tórteýi boıynsha ákimshilik aıyppuldar salý kózdelgen. Al qarama-qarsy qozǵalys jolyna shyqqany úshin 6 aıǵa kólik basqarý quqyǵynan aıyrylady», - dedi polıtsııadan.
