Polıtsııa formasyn zańsyz kıgen ánshi Kental aıyppul tóleıtin boldy
ALMATY. QazAqparat – Polıtsııa formasyn zańsyz kıgen ánshi Kental aıyppul tóleıtin boldy, dep habarlaıdy QazAqparat tilshisi.
Búgin Almaty qalasynyń sotynyń sheshimemen kópshilikke Kental degen atpen tanymal ánshi Talǵat Kenjebolatovqa QR Ákimshilik quqyq buzýshylyq týraly Kodekstiń 675-babyna (Aıyrym belgileri jáne (nemese) nyshany bar áskerı kıim nysanyn, sondaı-aq nysandy kıim men arnaýly kıim-keshekti zańsyz kıip júrý (paıdalaný) sáıkes 5 AEK kóleminde (13 890 teńge) aıyppul salyndy.
«Sýdıa keı derekti (vıdony) tolyq zerttemeı sheshim shyǵardy. Biz 10 kún ishinde sot sheshimine shaǵymdanatyn bolamyz. Biz sottyń sheshimimen kelispeımiz», - dedi ánshiniń qorǵaýshysy Murat Amıtov.
Aıta ketsek, polııatsııa áleýmettik jelilerdi baqylaý kezinde osy vıdeony anyqtaǵan. Beınekadrde polıtsııa qyzmetkeri beınesindegi er adam: «Bárińe sálem, dostar! Kim kúızeliske dýshar bolsa, júregi aýyrsa, jumysta, otbasynda qıyndyqtar týyndaǵan bolsa, bireýdi nesıe qınasa. Ýaıymdamańyz. Báribir bárimiz de ólemiz», - dedi. Tekserý kezinde vıdeo avtory ánshi jáne akter Kental bolyp shyqty.
Ánshiniń áleýmettik jelide jarııalanǵan vıdeojazba Almaty polıtsııasynyń nazaryna ilikken. Polıtsııa bul jazbany adamdardyń qaıǵy-qasiretin kelemejdeý dep baǵalady.
Almaty polıtsııasy belgili ánshi túsirgen vaınǵa qatysty málimdeme jasaǵandyǵyn jazdyq.
