Polıtsııa: Ertisten tabylǵan máıit - bir jyl buryn joǵalǵan áıeldiń denesi
PAVLODAR. QazAqparat - Pavlodar oblystyq ІІD Ertis ózeniniń jaǵasynan tabylǵan máıit bir jyl buryn iz-túzsiz joǵalǵan Darıa Nıkolaevanyń denesi ekenin resmı málimdedi, dep habarlaıdy «QazAqparat» HAA tilshisi.
ІІD baspasóz hatshysy Baıan Maǵzumovanyń aıtýynsha, molekýlıarlyq-genetıkalyq saraptama máıit DNQ-sy Darıa Nıkolaevanyń dezoksırıbonýkleın qyshqylymen sáıkestigin kórsetken. Máıit keshe jerlendi.
Joǵalǵan kelinshekti erikti izdestirý tobynyń ókili Ekaterına Kýdrıavtsevanyń aıtýynsha, saraptama bir aıǵa sozylǵan.
Qyrkúıekte Pavlodar oblysynda Ertis ózeniniń jaǵasynan áıel adamnyń denesi tabylýyna baılanysty «Adam óltirý» babymen sotqa deıingi tergep-tekserý bastalǵan. Eki aı buryn ІІD-degiler tabylǵan máıitti Darıa Nıkolaevanyń týystary tanı almaǵanyn aıtady. Óıtkeni uzaq ýaqyt sýda jatqan dene buzylyp ketken.
Polıtsııa ózendegi máıit týraly balyqshylardan biledi. Eriktilerdiń sózine qaraǵanda 2016 jylǵy 21 qazanda 28 jastaǵy Darıa Nıkolaeva iz-túzsiz joǵalyp, ony «Vıta» izdestirý jasaǵynyń músheleri izdeı bastaǵan.
Áıeldiń denesi 12 qyrkúıekte Jelezın aýdanynyń Moıseevka aýylynyń mańynan tabylǵanda onyń qoldary baılaýly, basy paketke oraýly bolǵan.
Týystary joǵalardan buryn Darıa júktiligine baılanysty demalysqa shyǵyp, týǵan aýyly Beregovoeden Tereńkól aýylyndaǵy kúıeýine bara jatqan. Sodan keıin ony tiri jan kórmegen.
ІІD «Adam óltirý» baby boıynsha tergep-tekserý jalǵasyp jatqanyn málimdedi. Kúdiktilerdiń biri retinde, tergeý nusqasy boıynsha, Darıany sońǵy ret kórgen kúıeýinen jaýap alynǵan.
