Polıtsııa elordada karantın rejıminiń saqtalýyn qalaı qadaǵalaıdy
Olar áskerı qyzmetshilerin jandaryna ertip qala kóshelerin sholyp, beısaýat júrgen turǵyndarǵa karantın rejıminiń talaptaryn túsindirip, tártipke boıusynbaǵandardy jazaǵa tartýǵa májbúr. Búgin BAQ ókilderimen qatar QazAqparat tilshileri de qala kóshelerin sholýǵa shyqqan polıtsııa qyzmetkerlerimen birge reıdke qatysyp qaıtqan edi.
Tilshiler ilesken Nur-Sultan qalasy Saryarqa aýdandyq polıtsııa basqarmasynyń Jergilikti polıtsııa qyzmeti bóliminiń bastyǵy, polıtsııa podpolkovnıgi Marat Ómirbaev jol boıy bizderge kúndelikti jumystary jaıynda aqparat berýge tyrysty.
«Nur-Sultan qalasynyń aýmaǵynda kúndelikti táýlik boıy rejımde qoǵamdyq tártipti qorǵaý, karantın rejımin saqtaý maqsatynda aýla aýmaqtarynda, kóshelerde jaıaý jasaq sholyp shyǵady. Nur-Sultan qalalyq polıtsııa departamenti qala aýmaǵynda koronavırýs indetiniń taralýyna jol bermeý, azamattardyń qaýipsizdigin qamtamasyz etý úshin barlyq qajetti sharalardy qabyldap jatyr», - dedi ol.
Polıtsııa qyzmetkerleri kúndelikti qala aýmaǵyndaǵy jumysyna kirispesten buryn topqa bólinedi. Topta bir polıtsııa qyzmetkeri men 2 áskerı qyzmetshi bolady. Olarǵa qala aýmaǵynda arnaıy bólingen aýmaqtaǵy qoǵamdyq tártipti, karantın rejıminiń saqtalýyn qamtamasyz etý júktelgen. Qoldarynda arnaıy jýrnal men planshet bar. Top kóshede, aýlada beısaýat júrgen adamdardy toqtatyp, ne maqsatpen, qaıdan kele jatqandaryn, qaıda bara jatqandaryn anyqtaýǵa tyrysady. Olardyń aty-jónderin jýrnalǵa ne bolmasa birden planshetke túsirip alady. Jalpy qala boıynsha 26 mobıldi post ornatylǵan.
«Barlyǵyn da qadaǵalap otyrmyz. Aıtalyq, bir adam Saryarqa aýdanynda turǵanymen Almaty aýdanynda júr delik. Al oǵan ruqsat joq. Sol sebepti turǵynnyń derekterin jazyp alyp, málimetter bazasynan tekseremiz. Birinshi joly kezikkende túsindiremiz, aıtamyz. Ózimiz úshin kerek shara ekendigin túsindirýge tyrysamyz. Árıne, bulqan-talqan ashýlanyp, tártipke baǵynǵysy kelmeıtin adamdar da kezigip jatady. Ondaı sátte baǵynbasa, barynsha qarsylyq tanytqa ákimshilik sıpattaǵy shara qoldanýǵa májbúr bolamyz», - dedi Marat Ómirbaev.
Karantın kezinde qoıylatyn talap ta, talapqa baǵyndaıtyndarǵa beriletin jaza da qatań. Beısaýat kóshede qydyramyn dep 10 aılyq eseptik kórsetkish kóleminde aıyppul alyp, tipti birneshe táýlik kúnińizdi temir torda ótkizýińiz bek múmkin. Aıtalyq, turǵynnyń kóshede asa qajettilik bolmasa da júrgeni anyqtalatyn bolsa, onda ol QR «Ákimshilik quqyq buzýshylyq týraly» kodeksiniń 476-babyna sáıkes ákimshilik jaýapqa tartylady. Al bul bapta jaza basqan janǵa 10 aılyq esepti kórsetkish kóleminde aıyppul nemese 15 táýlikke ákimshilik qamaýǵa alý qarastyrylǵan.
«Jedel shtabtyń sheshimi bar. Onda karantın rejımin saqtaý tizilimi naqty kórsetilgen. ıAǵnı, azamattar úılerine barynsha jaqyn ornalasqan dúkenge ǵana barýlary tıis. Árıne, túrli jaıttardyń da oryn alatyndyǵyn bilemiz. Máselen, siz bir aýdanda, al em alyp júrgen tis emhanańyz basqa aýdanda ornalasqan delik. Mundaı jaǵdaıda siz sol emhanadan emdelip júrgendigińiz týraly anyqtamamen oǵan esh kedergisiz bara alasyz», - dedi polıtsııa polkovnıgi.
Jalpy, reıd barysynda turǵyn úı aýlalaryndaǵy balalar jáne sport alańdarynda oıyn qyzyǵyna berilgen balalar kózge túsken joq. Degenmen, sholǵynshy polıtsııa qyzmetkerleri kezdesken turǵyndarǵa karantın kezinde qandaı qaýipsizdik sharalaryn ustaný kerektigin barynsha túsindirýge tyrysty.
