Polıtsııa Báıdibek aýdanynda joǵalǵan jasóspirimdi Shymkentten tapty
TÚRKІSTAN. QazAqparat – Báıdibek aýdanynyń polıtseıleri atasyna renjip Shymkent qalasyna ketip qalǵan jasóspirimdi tapty, dep habarlaıdy QazAqparat Túrkistan oblystyq PD baspasóz qyzmetine silteme jasap.
Báıdibek aýdandyq polıtsııa bólimine túnde saǵat 22:00-ler shamasynda 2007 jylǵy jasóspirim úıinen shyǵyp ketip, oralmaǵany jóninde habarlama kelip túsedi. Shaǵymdanýshynyń aıtýynsha 13 jastaǵy jasóspirim sol kúni túste atasymen sózge kelip qalyp, úıinen shyǵyp ketken.
Polıtseıler balany tabýǵa tez arada iske kiristi. Kórgen-bilgenderden surastyryp, jaqyn mańdardy aralap, balanyń barýy múmkin degen jerleri men tanystaryna suraý saldy.
1 saǵattan soń tergeý barysynda jasóspirimniń Shymkent qalasyndaǵy ákesiniń úıine barǵany anyqtaldy. Sondaı-aq, joǵalǵan 6 synyp oqýshysynyń ata-anasy osydan birneshe jyl buryn ajyrasqany belgili boldy.
Osylaısha jasóspirimdi alyp kelý maqsatynda aýdandyq polıtseılermen qatar, múddeli organdardyń ókilderi birlesip, Shymkent qalasyna jasóspirimniń ákesiniń úıine bardy.
«Otbasylyq kıkiljińniń saldarynan biraz qıyndyqtar týyndap, balany bergisi kelmegen ákesi úıinde joq bolyp shyǵady. Alaıda polıtseılerdiń muqııat atqarǵan jumystary arqasynda bala tańǵy saǵat 05:00 shamasynda týystarynyń úıinen tabyldy. Polıtseıler balany anasyna tabystady», delingen habarlamada.
Balanyń anasy polıtseılerge alǵys bildirdi.
Túrkistan oblysy polıtseıleri azamattarǵa kámelet jasyna tolmaǵan balalarymen dos bolyp, jıi sóılesip otyrýǵa, aralasatyn ortasyn tolyq bilip, baqylaýda ustaýǵa keńes beredi.
