Polıtsııa bastyǵy óz qyzmetkerlerinen aqsha alyp otyrǵan
ASTANA. QazAqparat - Qostanaı oblysynda ótken aptada paraqorlyqqa qatysty birneshe laýazymdy qyzmetker ustalyp, olardyń ústinen qylmystyq is qozǵaldy, dep habarlaıdy QazAqparat tilshisi.
«Qostanaı oblysynyń Jitiqara qalalyq jáne Jitiqara aýdandyq polıtsııa bóliminiń bastyǵy jáne osy bólimniń jergilikti polıtsııa qyzmeti bólimshesiniń bastyǵy sybaılas jemqorlyq boıynsha kúdikti dep tanyldy. 2018 jyldyń 21 jeltoqsanynda Qostanaı oblysy boıynsha sybaılas jemqorlyqqa qarsy qyzmetimen Jitiqara qalalyq jáne Jitiqara aýdandyq polıtsııa bóliminiń bastyǵy jáne osy bólimniń jergilikti polıtsııa qyzmeti bólimshesiniń bastyǵy 1,5 mln teńge somasynda para alý barysynda ustaldy. Kúdiktiler baǵynyshty qyzmetkerlerine buryn ústemaqy retinde tólengen aqsha qarajatyna zańsyz alym-salyqty iske asyrǵan», - dedi búgin Astanada ótken baspasóz máslıhatynda QR Memlekettik qyzmet isteri jáne sybaılas jemqorlyqqa qarsy is-qımyl agenttigi qoǵammen baılanys jónindegi departamentiniń dırektory Arman Berdalın.
Onyń aıtýynsha, 2018 jyldyń 22 jeltoqsanynda Qostanaı qalalyq mamandandyrylǵan tergeý sotymen bólim bastyǵyna qatysty qamaýda ustaý sharasy sanktsııalanǵan. Jergilikti polıtsııa qyzmeti bólimshesiniń bastyǵyna qatysty úıqamaq túrinde bultartpaý sharasy qabyldandy. Sotqa deıingi tergeý amaldary jalǵasýda.
Sonymen birge, Arman Berdalın Qostanaı oblystyq onkologııalyq dıspanseriniń bas dárigeri men onyń orynbasary sybaılas jemqorlyq boıynsha kúdikti dep tanylǵanyn aıtyp ótti.
«Qostanaı oblystyq onkologııalyq dıspanseriniń bas dárigeri men onyń orynbasaryna qatysty qylmystyq is tergelýde. Olar jeke menshik kásiporyn dırektorynan 4,4 mln teńge somasynda para aldy dep kúdikke ilingen. Sotqa deıingi tergeý amaldary jalǵasýda», - dedi ol.
